ހިރިލަންދޫއަށް ދިމާވެފައިވާ ގެދޮރުގެ ދަތިކަން ހައްލުކުރުމަށް ރައީސް ޔާމީން ވަނީ ނިންމާފަ- މިނިސްޓަރ މުއިއްޒު
ތ. ހިރިލަންދުއަށް ދިމާވެފައިވާ ޖާގައިގެ ދަތިކަން ހައްލުކުރުމަށް އެރަށުގެ ފަޅުން ބިންހިއްކުމަށް ހަމަޖެހިފައިވާކަމަށް މިނިސްޓަރ އޮފް ހައުސިން އެންޑް އިންފްރަސްޓަރކްޗަރ ޑރ.މުޙައްމަދު މުއިއްޒު ވިދާޅުވެއްޖެއެވެ.
ތ މަޑިފުށީގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން މިނިސްޓަރ ވިދާޅުވީ އެ އަތޮޅު ހިރަލަންދޫގެ ފަޅަކީ ހުޅުމާލެ ނުވަތަ ވިލިމާލެ ދެއަކާއި ފުށިދިއްގަރު ފަޅުގައި ހިންގުމަށް ހަމަޖެހިފައިވާ ބޮޑެތި މަޝްރޫޢުތައް ހިންގޭވަރުގެ ބޮޑު ފަޅެއްކަމަށެވެ. ނަމަވެސް އެރަށުގެ ފަޅުން ހިއްކުމަށް ހަމަޖެހިފައިވާ ބިން ބޭނުންކުރުމަށް ސަރުކާރުން ނިންމާފައިވަނީ ޖާގައިގެ ދަތިކަން ދިމާވެފައިވާ އެރަށުގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ކަމަށެވެ. އެގޮތުން ރައީސުލްޖުމްހޫރިއްޔާ ޢަބްދުﷲ ޔާމިން އަބްދުލް ޤައްޔޫމް ދެވަނަ ދައުރަކަށް ހޮވިވަޑައިގެންފިނަމަ، ހިރިލަންދޫގެ ރައްޔިތުންނަށް ދިމާވެފައިވާ ގޯތިގެދޮރުގެ ދަތިކަމަށް ހައްލެއް ހޯދައިދިނުމަށް އެރަށަށް ބޭނުންވާ ބިން ހިއްކުމަށް ރައީސް ޔާމީން ނިންމަވާފައިވާކަމަށެވެ. އަދި މި މަޝްރޫޢުގެ ސަބަބުން ޖާގައިގެ ދަތިކަން ހައްލުވެ ޒުވާނުންނާއި ރަށުގެ ރައްޔިތުންނަށް އެކި މަސައްކަތް ކުރާނެ ޖާގަވެސް ލިބިގެންދާނެކަން މިނިސްޓަރ ފާހަގަކުރެއްވިއެވެ.
މިނިސްޓަރ މުއިއްޒު ވިދާޅުވީ، ރައީސުލްޖުމްހޫރިއްޔާގެ ވިސްނުންފުޅަކީ ހަމައެކަނި މާލެ ސަރަޙައްދު ތަރައްޤީކުރުން ނޫންކަމަށެވެ. މިނިސްޓަރ ވިދާޅުވީ ރައީސް ޔާމީންގެ ވިސްނުންފުޅަކީ މުޅި ރާއްޖެ ތަރައްޤީކޮށް ރައްޔިތުންނަށް ދިމާވެފައިވާ ބޯހިޔާވަހިކަމަށް ދާއިމީ ހައްލެއް ހޯދައި ދިނުންކަމަށެވެ.
މި ސަރުކާރުން ވޭތުވެދިޔަ 4 އަހަރު ހޯދާފައިވާ ކާމިޔާބީ ފާހަގަ ކުރައްވަމުން މިނިސްޓަރ ވިދާޅުވީ، ވޭތުވެ ދިޔަ 4 އަހަރާއި ބައިގެ ތެރޭގައި ރާއްޖޭގެ އެކި ކަންކޮޅުތަކުގައި ބިން ހިއްކުމުގެ 16 މަޝްރޫއު ހިންގާފައިވާއިރު 631 ހެކްޓަރުގެ ބިން ހިއްކާފައިވަކަމަށެވެ. އެހެންކަމުން ސަރުކާރުން ކުރިއަށްގެންދިޔަ ބިން ހިއްކުމުގެ މަޝްރޫއުތަކަކީވެސް ރައްޖޭގެ ތާރިޚުގައި ރަންއަކުރުން ލިޔެވޭނެ މަސައްކަތްތަކެއްކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ އެމްޑީޕީގެ ސަރުކާރުން ބިންހިއްކުމުގެ 6 މަޝްރޫއެއް ކުރިއަށްގެންގޮސްފައިވާއިރު ހިއްކާފައިވަނީ 180 ހެކްޓަރުގެ ބިންކަމަށެވެ. އަދި އެ ސަރުކާރަށް ލިބުނު ފަސް އަހަރު ފުރިހަމަނުކޮށް ދޫކޮށްލިއިރު، ފާހަގަކުރެވޭވަރަށް ތަރައްޤީގެ މަޝްރޫއުތައް ކުރިއަށްގެންގޮސްފައިނުވާކަން މިނިސްޓަރ ފާހަގަކުރެއްވިއެވެ.