އައްޑޫސިޓީ ކަނޑިހެރަ ޞަރަޙައްދާއި އައްޑޫގެ އެތެރެވަރިއަށް ފައްތާލެވިފައިވާ "ބްރިޓިޝް ލޯޔަލްޓީ" ނައު އޮންނަ ޞަރަޙައްދު ބޭނުން ކުރުމުގައި ސަމާލުވުމަށް އެންވަޔަރަންމެންޓަލް ޕްރޮޓެކްޝަން އޭޖެންސީ (އީ.ޕީ.އޭ) އިން އިލްތިމާސް ކޮށްފިއެވެ.
އީޕީއޭއިން މިކަމަށް އިލްތިމާސްކޮށް ޢާއްމު ކުރި އިޢުލާނުގައި ބުނެފައިވަނީ މި ދެޞަރަޙައްދައް ފީނުމާއި، ސްނޯކްލިންގް ކުރުމާއި، އަދި އެހެނިހެން ޙަރަކާތްތަށް ހިންގުމަށް ޒިޔާރަތް ކުރާ ފަރާތްތަކުން މާޙައުލަށާއި ދިރުންތަކަށް ގެއްލުން ނުވާ ގޮތަށް ޢަމަލުތަށް ބެހެއްޓުމަށް އިލްތިމާސް ކުރާ ކަމަށެވެ.
އައްޑޫ ސިޓީގެ ކަނޑިހެރަ ޞަރަޙައްދު ޙިމާޔަތް ކޮށްފައިވަނީ، ކަނޑިހެރެ-މާކަނޑު ކަނޑުއޮޅިއާއި، ވަށައިގެންވާ ކަނޑާއި ފަރާއި އަދި އެއްގަމު ހިމެނޭ ގޮތަށް 170 ހެކްޓަރުގެ ޞަރަޙައްދެކެވެ. އައްޑޫ ސިޓީ ގެ އެތެރެވަރިއަށް ފައްތާލެވިފައިވާ ބްރިޓިޝް ލޯޔަލްޓީ ނައު އޮތް ސަރަހައްދުން 13 ހެކްޓަރުގެ ކަނޑުގެ ޞަރަޙައްދެއްވަނީ ޙިމާޔަތް ކުރެވިފައެވެ.
އައްޑޫ ސިޓީގައި ޙިމާޔަތް ކޮށްފައިވާ ޞަރަޙައްދު ރައްކާތެރިކޮށް ދެމެހެއްޓުމާއި ބެހޭ ޤަވާއިދު މިދިޔަ ސެޕްޓެމްބަރު މަހު ގެޒެޓް ކޮށް ޝާއިއު ކޮށްފައިވާއިރު، މިޤަވާއިދަށް މިމަހުގެ 13 އިން ފެށިގެން ވަނީ ޢަމަލު ކުރަން ފަށާފައެވެ. މި ދެސަރަހައްދު ހިމާޔަތް ކުރުމަށް ނިންމާފައިވަނީ މި ޞަރަޙައްދު ޤުދުރަތީގޮތުންނާއި ތަބީޢީގޮތުން، އޮތްގޮތަށް ދެމެހެއްޓުމަށާއި، ޤުދުރަތީ ވަޞީލަތްތައް ރައްކާތެރިކޮށް ބެލެހެއްޓި، އަދި ރައްޔިތުންނަށް ޤުދުރަތީ މާޙައުލުގެ ފައިދާ ލިއްބައި ދިނުމައްޓަކައި ކަމަށް މިނިސްޓްރީ އޮފް އެންވަޔަރަންމަންޓުން ބުނެއެވެ.
މިނިސްޓްރީ އޮފް އެންވަޔަރަންމެންޓުން މިދިޔަ ސެޕްޓެމްބަރު މަހު ގެޒެޓް ކުރި ޤަވާއިދު ދަށުން ފުރަތަމަ 6 މަސް ދުވަހު މި ޞަރަޙައްދުތަކަށް ޒިޔާރަތް ކުރާ ފަރާތްތަކުގެ އަތުން ފީއެއް ނުނަގާނެއެވެ. ނަމަވެސް 6 މަސް ފަހުން ވިޒިޓަރސް ފީއެއް ނެގުމަށް ވަނީ ހަމަޖެހިފައެވެ. އަދި މިގޮތަށް ނެގޭ ފީ، ޓްރަސްޓް ފަނޑަކަށް ޖަމާކޮށް ޚަރަދު ކުރުމަށް ހަމަޖެހިފައިވަނީ އެ ޞަރަޙައްދު ބެލެހެއްޓުމަށާއި، ސިޓީގެ ތިމާވެށި ޙިމާޔަތް ކުރުމަށާއި، ޢިޖްތިމާޢީ އެކި އެކި ޙަރަކާތް ހިނގުމަށް ކަމަށް މިނިސްޓްރީ އިން ބުނެއެވެ.