ޗައިނާއަށް އެތެރެކުރާ މުދާ އިތުރުކުރުމަށްޓަކައި ބާއްވާ ޗައިނާ އިންޓަރނޭޝަނަލް އިމްޕޯޓް އެކްސްޕޯގައި ރާއްޖޭގެ މަސްވެރިކަން އިޝްތިހާރުކުރުމަށްޓަކައި ރާއްޖޭގެ މަސްވެރިކަމުގެ ވިޔަފާރީގައި ހަރަކާތްތެރިވާ 9 ކުންފުންޏަކުން ބައިވެރިވެއްޖެއެވެ.
ފަސް ދުވަހުގެ މުއްދަތަކަށް ޗައިނާގެ ވިޔަފާރީގެ މައި މަރުކަޒު، ޝަންގްހާއީގައި ކުރިއަށްދާ މި އެކްސްޕޯއަކީ ޗައިނާގައި މިއަހަރު ބާއްވާނެ އެންމެ ބޮޑު އެކްސްޕޯއެވެ. 100 އަށް ވުރެ ގިނަ ޤައުމަކުން 800 އެއްހާ ވިޔަފާރި ކުންފުނިން ޗައިނާ އިންޓަރނޭޝަނަލް އިމްޕޯޓް އެކްސްޕޯ، ސީއައިއައިއީ ގައި ވަނީ ބައިވެރިވެފައެވެ. ތަފާތު އެކި ބާވަތްތަކުގެ މުދާ ޗައިނާގެ މާކެޓަށް ތަޢާރަފްކޮށް ޗައިނާއިން ވިޔަފާރީގެ ބައިވެރިން ހޯދުމަށް މި ފެއަރއަކީ މުހިއްމު ފެއަރއެކެވެ.
ރާއްޖެއިން މި ފެއަރގައި ބައިވެރިވެފައިވަނީ ރާއްޖޭގެ ކަނޑުން ބާނާ މަސް ޕްރޮސެސްކުރާ ފަރާތްތަކާއި މަހުގެ އުފެއްދުންތައް ބޭރަށް ވިއްކާ ފަރާތްތައް ގުޅިގެން އުފައްދާފައިވާ މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަންގެ އިސްނެންގެވުމުގެ މަތިންނެވެ. އެގޮތުން އެސޯސިއޭޝަންއާ އެކު ރާއްޖޭގައި މަހުގެ ވިޔަފާރި ކުރާ 9 ކުންފުންޏަކުން އެކްސްޕޯގައި ވަނީ ބައިވެރިވެފައެވެ. ފެއަރގެ ތެރެއިން ޕީއެސްއެމް ނިއުސްއާ ވާހަކަދައްކަވަމުން އެ އެސޯސިއޭޝަންގެ ރައީސާ ފަޒްލާ ޔޫސުފް ވިދާޅުވީ މި އެކްސްޕޯއަކީ ފައިދާހުރި ފެއަރއަކަށް ވާނެ ކަމަށް އުއްމީދު ކުރާ ކަމަށެވެ.
"މި އެކްސްޕޯ މެދުވެރިކޮށްވެސް ކުންފުނިތަކަށް ރަގަޅު މާރކެޓެއް ލިބޭނެ ކަމަށް އުއްމީދު ކުރަން، އަދި މިއަހަރުގެ އެކްސްޕޯ ރާއްޖޭގެ ކުންފުނިތަކަށް ކާމިޔާބު ނަމަ އަންނަ އަހަރުވެސް އެސޯސިއޭޝަނުން މި އެކްސްޕޯގައި ބައިވެރިވާނެ" ފަޒްލާ ވިދާޅުވިއެވެ.
ސީއައިއައިއީ ގައި ބައިވެރިވެފައިވާ ދިވެހި ކުންފުނިތަކުގެ ތެރޭގައި އެންސިސް ޕިޝަރީޒް، އޯޝަން ހަންޓަރސް، ހޮރައިޒަން ފިޝަރީޒް އަދި ރާއްޖޭގައި ހުއިފިލަނޑާގެ ވިޔަފާރި ކުރާ ކުންފުންޏެއް ކަމަށްވާ ބްލޫ ބްރިޖް ފަދަ ކުންފުނިތައް ހިމެނެއެވެ. މިހާތަނަށް ލިބުނު ތަރުހީބަށް ބަލާއިރު އެކްސްޕޯ ކާމިޔާބުވާނެ ކަމަށް އެފަރާތްތަކުން ލަފާކުރެއެވެ.
ޗައިނާ އިންޓަރނޭޝަނަލް އިމްޕޯޓު އެކްޕޯ ރަސްމީކޮށް ހުޅުއްވައިދެއްވީ ޗައިނާގެ ރައީސް ޝީ ޖިންގޕިންގެވެ. މިއީ ޗައިނާއިން މި އެކްސްޕޯ ބާއްވާ ފުރަތަމަ ފަހަރެވެ. އަދި މި އެކްސްޕޯއަކީ ޗައިނާގެ އިޤްތިސާދާ ގުޅިފައިވާ އެޤައުމަށް މުޙިއްމު އެކްސްޕޯއެކެވެ.