ސިވިލް ސަރވިސް ޓެރެއިނިންގ އިންސްޓިޓިއުޓުން މިއަހަރު ހިންގި ދިގު މުއްދަތުގެ ކޯސްތަކުން 126 ދަރިވަރުން ދަސްވެނިވެއްޖެއެވެ.
ދަސްވެނިވުމުގެ ރަސްމިއްޔާތު ބާއްވާފައިވަނީ މިއަދު އިންސްޓިޓިއުޓް ފޯ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް، އިސްކަންދަރުކޮށީގައެވެ.
ސިވިލް ސަރވިސް ޓްރެއިނިންގ އިންސްޓިޓިއުޓުގެ ދަސްވެނިވުން ޝަރަފުވެރިކޮށްދެއްވީ މާލެ ސިޓީ މޭޔަރ ޝިފާ މުޙައްމަދު އެވެ.
މި އަހަރުގެ ދަސްވެނިވުމުގެ ރަސްމިއްޔާތުގައި 5 ކޯހެއް ފުރިހަމަ ކުރި ދަރިވަރުންނަށް ވަނީ އެކަމުގެ ލިޔުން ޙަވާލުކޮށްފައެވެ. އެއީ ސެޓްފިކެޓް 3 އިން އޮފީސް އެޑްމިނިސްޓްރޭޝަން ކޯހާއި، ސެޓްފިކެޓް 3 އިން އެކައުންޓިން އެންޑް ފައިނޭންޝިއަލް އެޑްމިނިސްޓްރޭޝަން ކޯހާއި އިންގްލިސް ލޭންގްއޭޖް ޕްރޮފިސެންސީ ފޯ އެގްޒެކެޓިވްސް ކޯހާއި، ޑިޕްލޮމާއިން ޕަބްލިކް އެޑްމިނިސްޓްރޭޝަން ކޯހުގެ އިތުރުން ޔުނިވަރސިޓީ ޕްރިޕަރޭޝަން ޕްރޮގްރާމެވެ.
މި ރަސްމިއްޔާތުގައި ވާހަކަދައްކަވަމުން މާލެ ސިޓީގެ މޭޔަރ ޝިފާ މުޙައްމަދު ވަނީ ސިވިލް ސަރވިސްގެ އިންސްޓިޓިއުޓް އުފެދުމާއިއެކު، އެކިއެކި ދާއިރާތަކުން ދިވެހި މުވައްޒަފުން ތަމްރީން ކުރުމަށް މަސައްކަތް ކުރަންފެށިކަން ފާހަގަކުރައްވާފައެވެ.
މި ކޯސްތަކުގެ އަލީގައި ލިބުނު ތަމްރީންތަކުގެ ސަބަބުން ކުރިން ދިމާވެފައިހުރި ކަންތައްތައް ރަނގަޅުކުރުމަށް ފުރުޞަތު ލިބިގެންދާނެކަން ޝިފާ ވިދާޅުވިއެވެ. ޝިފާ ވަނީ ރާއްޖޭގެ ހިނގަމުންދާ ކޮރަޕްޝަނާއި ވައްކަމުގެ މައްސަލަތައް ހައްލުކުރުމަށް މަސައްކަތްކުރުމަށް ދަސްވެނިންގެ ކިބައިން އެދިވަޑައިގެންފައެވެ.
"ރާއްޖޭގައި މިހާރު ފެތުރިފައި މިވާ ވައްކަމާއި ކޮރަޕްޝަންގެގެ ކަންކަން ނައްތާލުމަށްޓަކައި މުހިއްމު ރޯލެއް އަދާކުރެވިދާނެ. އެންމެން ޤަބޫލް ކުރަންޖެހޭ ކަމަ ވަޒީފާތައް ލިބެނީ މުވައްޒަފުންގެ ޤާބިލްކަމުންކަން. ވަކި މީހަކު ވަޒީފާ ދިނީމާ ނޫން ވަޒީފާ ލިބެނީ." ޝިފާ ވިދާޅުވިއެވެ.
ޓްރެއިނިންގް އިންސްޓިޓިއުޓްގެ ދަސްވެނިވުމުގެ ރަސްމިއްޔާތުގައި ވާހަކަދައްކަވަމުން ސިވިލްސަރވިސް ކޮމިޝަންގެ ރައީސް ޑރ. ޢަލީ ޝަމީމް ވިދާޅުވީ، ސިވިލް ސަރވިސް މުވައްޒަފުންނަކީ އަމިއްލަ ހިތްވަރާއެކު ކުރިއެރުމަށް އިސްކަންދޭ ބަޔަކަށް ވާންޖެހޭނެކަމަށެވެ. މުއްސަސާތަކުގައި ތިބި ރަނގަޅަށް މަސައްކަތް ކުރާ މުވައްޒަފުން ވަޒީފާއިން ވެކިވެގެން ދިޔުމަކީ ކަންބޮޑުވާންޖެހޭ ކަމެއްކަން ޝަމީމް ވަނީ ފާހަކޮށްފައެވެ.
" އަޅުގަނޑުމެންނަށް ރަނގަޅު ޤާބިލް ސިވިލް ސަރވަންޓުން ސިވިލް ސަރވިސްއަށް ހޯދުމަކީ ގޮންޖެހުމެއް. ރާއްޖެ ކުރިއަރާ ބާރު ސްޕީޑާއު އިޤްތިޞާދަށް އަންނަ ކުރިއެރުމާއި ވަޒީފާގެ ބާޒާރަށް ބަލާއިރު ސިވިލް ސަރވިސްގެ މުވްއްޒަފުންގެ އަދިވެސް ވާދަވެރިއެއް ނޫން." ޝަމީމް ވިދާޅުވިއެވެ.
ސިވިލް ސަރވިސް ޓްރެއިނިންގ އިންސްޓިޓިއުޓުން މިއަހަރުގެ މިހާތަނަށް 2418 މުވައްޒަފުން ދަސްވެނިވެފައިވާކަމަށް އެ އެއިންސްޓިޓިއުޓުން ބުނެއެވެ.
ސިވިލް ސަރިވިސް ކޮމިޝަންގެ ޓްރެއިނިން އިންސްޓިޓިއުޓުން މިހާރުވެސް ގެންދަނީ ރާއްޖޭގެ އެކި ކަންކޮޅުތަކުގައި ސެޓްފިކެޓް ފެންވަރާއި، ޑިޕްލޮމާ ފެންވަރުގެ ކޯސްތައް ކުރިއަށް ގެންދަމުންނެވެ. މި ރަސްމިއްޔާޓުގައި ވަނީ މިއަހަރު އެ އިންސްޓިޓިއުޓުން ހިންގި އެކި ކޯސްތަކުން ވަނަވަނައަށް އައި ދަރިވަރުން ހޮވާފައެވެ.
ސިވިލް ސަރވިސް ޓްރެއިނިންގ އިންސްޓިޓިއުޓުގެ ދަސްވެނިވުމުގެ ރަސްމިއްޔާތުގައި 2019 އަހަރުގެ ސިވިލް ސަރވިސް ޓެރެއިނިންގ ޑައިރެކްޓްރީއާއި، 2018 ވަނަ އަހަރިގެ ސިވިސް ސަރވިސް އިންސްޓިޓިއުޓްގެ ނިއުސް ލެޓާ ވަނީ އިފްތިތާހުކޮށްފައެވެ.