ޤައުމުތަކުގެ ސަޤާފީ ހެދުންތަކަށް ޙާއްސަކޮށްގެން ޗައިނާގައި ބޭއްވި މުބާރާތަކުން ދިވެހި ސަޤާފީ ހެނދުންތަކަށް "ބެސްޓް ކޮސްޓިއުމް" އެވޯޑް ލިބިއްޖެއެވެ.
ޗައިނާގައި ހުންނަ ބޭރު ޤައުމުތަކުގެ އެމްބަސީތަކަށް އަމާޒުކޮށްގެން "ލިއަންގމާޗިއާއޯ ޑީއާރުސީ ޑިޕްލޮމެޓް ނޭޝަނަލް ކޮސްޓިއުމް ކޮމްޕެޓިޝަން" ގައި ޗައިނާ ހިމެނޭހެން 16 ޤައުމަކުން މިއަހަރު ބައިވެރިވެފައިވާއިރު، މި ހަރަކާތުގައި ބައިވެރިވި ހުރިހާ ޤައުމުތަކުގެ ތެރެއިން އެންމެ މޮޅު ހެދުމުގެ އެވޯޑް ލިބިފައިވަނީ ދިވެހިރާއްޖެއަށެވެ. މި މުބާރާތުގައި ޗައިނާގައި ހުންނަ ދިވެހި އެމްބަސީގެ މުވައްޒަފުންނާއި، ޗައިނާގައި ދިރިއުޅޭ ދިވެހި ކިޔަވާ ކުދިން ބައިވެރިވެ ދިވެހި ސަޤާފީ ހެދުންތައް ނެށުމުގެ ޙަރަކާތަކާއެކު ދައްކާލާފައެވެ.
ދިވެހިރާއްޖޭގެ ފަރާތުން މި އިވެންޓްގައި ހުށަހަޅައިދިން އައިޓަމަށް ބެލުންތެރިންގެ ފަރާތުންވެސް ބޮޑު ތަރުހީބެއް ލިބުނުކަން ފާހަގަކޮށްލެވެއެވެ. މިއީ ރާއްޖެއިން މި މުބާރާތުގައި ބައިވެރިވި ފުރަތަމަ ފަހަރެވެ. މި މުބާރާތުގައި އެކި ކެޓަގަރީތަކުން އެވޯޑްތައް ވަނީ ދީފައެވެ. އެގޮތުން މުޅި މުބާރާތުންވެސް އެންމެ މޮޅު ކޮސްޓިއުމްގެ އެވޯޑް ލިބިފައިވަނީ ދިވެހިރާއްޖެއަށެވެ.
ރާއްޖޭގެ ސަޤާފަތާއި ދިވެހިރާއްޖޭގެ ފަތުރުވެރިކަން ޗައިނާގައި އިޝްތިހާރުކުރުމަށް ޗައިނާގައި ހުންނަ ދިވެހި އެމްބަސީއިން މިފަދަ އެކި ހަރަކާތްތަކުގައި އަންނަނީ ބައިވެރިވަމުންނެވެ.