މާލޭގައި ކުޑަކުއްޖެއްގެ ގަޔަށް ސިމެންތި ބަސްތާއެއް ވެއްޓުނު ހާދިސާ ސީރިއަސް މައްސަލައެއްގެ ގޮތުގައި ބަލާނެކަމަށް ސަރުކާރުން ބުނެފިއެވެ.
މި ހާދިސާއާއި ގުޅިގެން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ މިއީ އަޅާނުލައި ދޫކޮށްލެވޭނެފަދަ މައްސަލައެއް ނޫންކަމަށާއި، މިކަން ތަޙްޤީގުކުރަންޖެހޭ ކަމެއްކަމަށެވެ. މިނިސްޓަރ ވިދާޅުވި މިފަދަ ކަންކަން ތަކުރާރުނުވާގޮތަށް ފިޔަވަޅު އަޅަންޖެހޭކަމަށާއި، މިއަދު ހިނގި ހާދިސާ ސަރުކާރުން ސީރިއަސް މައްސަލައެއް ގޮތުގައި ބަލާނެ ކަމަށެވެ.
މިހާދިސާއާ ގުޅޭގޮތުން މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ކުރެއްވި ޓްވީޓެއްގައި ވިދާޅުވީ ކުޑަކުއްޖެއްގެ ބޮލަށް ސިމެންތި ބަސްތާއެއް ވެއްޓި އަނިޔާވެފައިވަނީ އިމާރާތްކުރުމުގައި ރައްކާތެރިވާންވީ މިންވަރަށް ރައްކާތެރިނުވުމުގެ ސަބަބުންކަމަށެވެ. އަދި މިފަދަ ހާދިސާއެއްގައި ކުޑަކުއްޖަކަށް ބޮޑެތި ގެއްލުންތަކެއް ލިބުމަކީ ޤަބޫލު ކުރެވޭކަމެއް ނޫންކަމަށާއި މި މައްސަލަ ބަލައި އެ މިނިސްޓްރީގެ ފަރާތުން އަޅަންޖެހޭ ފިޔަވަޅުތައް އަޅާނެކަމަށް މިނިސްޓަރ ވިދާޅުވިއެވެ.
މާފަންނު ނަލަހިޔާ ކައިރީގައި އިމާރާތްކުރަމުންދާ ގެއެއްގެ މަތިން ވެއްޓުނު ސިމެންތި ބަސްތާއަކުން ޖެހި ޒަޚަމްވި ކުއްޖާގެ ހާލު ސީރިއަސްކަމަށް އައިޖީއެމްއެޗުން ބުނެއެވެ. މިއަދު ހެދުނު ހިނގި މިހާދިސާގައި ޒަހަމްވެފައިވަނީ އުމުރުން 9 އަހަރުގެ ބަންގްލަދޭޝްއަށް ނިސްބަތްވާ އަންހެން ކުއްޖެކެވެ.