މިމަހުގެ 5 ވަނަ ދުވަހު މާލެއަށްކުރި ވިއްސާރައިގައި ގެއްލުން ލިބުނު ގެތަކުގެ ތެރެއިން 60 އަށްވުރެ ގިނަ ގެއަށް ފައިސާގެ އެހީ ދީފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ބުނެފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެންޑީއެމްސީގެ މީޑިއާ އޮފިޝަލް ހިސާން ޙަސަން ވިދާޅުވީ މިދިޔަ ބުރާސްފަތި ދުވަހުގެ ނިޔަލަށް 62 ގެއަކަށް ފައިސާގެ އެހީދީފައިވާކަމަށާއި މިހާރުވެސް ގެތަކަށް ފައިސާ ހަވާލުކުރުމުގެ މަސައްކަތް ކުރަމުންދާކަމަށެވެ.
މިމަހުގެ 5 ވަނަ ދުވަހު މާލެއަށް ކުރި ވިއްސާރައިގައި ގެއްލުން ލިބުނު ގެތަކުގެ އެސެސްމަންޓު ހެދުމަށްފަހު 127 ގެއަކަށް ފައިސާގެ އެހީދިނުމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ވަނީ ނިންމާފައިވާއިރު، ފައިސާ ދިނުމުގައި ބަލަނީ އެސެންޓަރުން ކަނޑައަޅާފައިވާ ރިލީފް ގައިޑްލައިނާ އެއްގޮތަށްކަމަށް އެސެންޓަރުން މައުލޫމާތުދެއެވެ. އެންޑީއެމްސީން ބުނީ މިދުވަސްވަރަކީ ސްކޫލް ޗުއްޓީ ދުވަސްވަރުކަމުން އެހީ ދޭންޖެހޭ ބައެއް ފަރާތްތައް މާލޭގައި ނޫޅުމުގެ ސަބަބުން އެހީ ހަވާލުކުރުމުގެ މަސައްކަތް ދިގުލައިގެންދާކަމަށެވެ.
ނޭޝަނަލް ޑިޒާސްޓަރ މެނޭޖްމަންޓު ސެންޓަރުން ބުނީ އެންމެ ބޮޑަށް ގެއްލުންވި ގެތަކަށް 45000 ރުފިޔާއާ ހަމައަށް ފައިސާ ދިނުމަށް ހަމަޖެހިފައިވާކަމަށެވެ.
މާލެއަށްކުރި ވިއްސާރައިގައި ފެންބޮޑުވުމުގެ ސަބަބުން ލިބުނު ގެއްލުންތަކުން އަރައިގަތުމަށް އަމިއްލަ ފަރާތްތަކާއި، ވިޔަފާރިވެރިންނާއި، ކުންފުނިތަކުން އެހީގެ ގޮތުގައި 1.3 މިލިއަން ރުފިޔާ ދީފައިވެއެވެ. މާލެއަށް ކުރި ވިއްސާރައިގައި ފެންބޮޑުވެ، ގެތަކަށް ފެން ވަދެ އެކިވަރުގެ ގެއްލުންތައް ލިބިފައިވެއެވެ.