ދައުލަތުގެ ޓެކްސް އިދާރާ ފާހަގަކުރެވިފައިވަނީ ވިޔަފާރިތަކަށްހުރި ގެއްލުމެއްގެ ގޮތުގައިކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
މޯލްޑިވްސް ބޯޓިންގ އެވޯޑު ދިނުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޒު ވިދާޅުވީ، ވޭތުވެދިޔަ 5 އަހަރެއްހާ ދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީން އަމަލުކުރަމުން ގޮސްފައިވަނީ ރާއްޖޭގެ ވިޔަފާރިތަކަށް ގެއްލުންވާގޮތައްކަމަށެވެ. މިނިސްޓަރު ފައްޔާޒް ވިދާޅުވީ،
މީރާ އުފެދިގެން އައީ ވިޔަފާރިތަކަށް ބިރުވެރިތަނެއްގެ ގޮތުގައި ނޫންކަަމަށާއި، ނަމަވެސް ވިޔަފާރިތަކާއިމެދު މީރާއިން އަމަލުކުރިގޮތުގެ ސަބަބުން ބައެއް ކުންފުނިތައް ބަނގުރޫޓްވެފައިވާކަމަށެވެ.
ދައުލަތުގެ ޓެކްސް އިދާރާއާއި ބެހޭގޮތުން އިތުރަށް ވާހަކަފުޅުދައްކަވަމުން މިނިސްޓަރ ވިދާޅުވީ، މީރާ ހިންގަމުން އަންނަ އުސޫލު ބަދަލުކޮށް، ކުރިއަށްއޮތް ހަފްތާއެއްހާ ދުވަހުގެ ތެރޭގައި ޓެކުހާ ގުޅޭ ޤާނޫނުތައް މުރާޖަޢާ ކުރުމުގެ މަސައްކަތް ފައްޓަވާނޭކަމަށެވެ.
މިނިސްޓަރު ފައްޔާޒު ވިދާޅުވީ، މީގެކުރީގެ ސަރުކާރުތަކުން ދައުލަތުގެ އިދާރާތައް ބޭނުންކުރަމުން އައިސްފައިވަނީ ވިޔަފާރި އިންޑަސްޓްރީތަކަށް ބެލުމެއްނެތި، ސިޔާސީގޮތުން ބޭނުންވާ ވަކިކަމެއް ނުވަތަ ސަރުކާރަށް ދަތިވާ ކަމެއް ހައްލުކުރުމަށްކަމަށެވެ.
މި ސަރުކާރުން މަސައްކަތްކުރާނީ ވިޔަފާރިވެރިންނާއި ގުޅިގެން އެފަރާތްތަކަށް ދިމާވާ މައްސަލަތައް ހައްލުކުރަން ކަމަށާއި، މިގޮތުން އިމްޕޯޓް ލައިސަންސް ބާތިލްކުރަން ނިންމާފައިވާކަމަށް މިނިސްޓަރު ވިދާޅުވިއެވެ. އަދި އުވާނުލެވިވާ 7500 އަށްވުރެ ގިނަ ކުންފުނި ކުރިއަށްއޮތް ހަފްތާއެއްހާ ދުވަހުގެ ތެރޭގައި އުވާލުމުގެ މަސައްކަތް ކުރައްވާނެކަމަށްވެސް މިނިސްޓަރު ވިދާޅުވެފައިވެއެވެ.