އަންނަ އޭޕްރީލްމަހު ބޭއްވުމަށް ހަމަޖެހިފައިވާ 3 ވަނަ ޓީޓީއެމް ފެއަރގައި ބައިވެރިވުމަށް ބޭނުންވާ ފަރާތްތައް ރަޖިސްޓްރީ ކުރުމަށް ހުޅުވާލުމުން ބޮޑު ތަރުހީބެއް ލިބެމުންދާކަމަށް ފެއަރ އިންތިޒާމްކުރާ ފަރާތުން ހާމަކޮށްފިއެވެ.
ޓްރެވަލް ޓްރޭޑް މޯލްޑިވްސް (ޓީޓީއެމް) ފެއަރ އިންތިޒާމްކުރާ މޯލްޑިވްސް ގެޓަވޭސް އިން ބުނީ މިއަހަރުގެ ފެއަރއަށް ބޭރުގެ 300 ޓުއަރ އޮޕަރޭޓަރުން ގެނައުމަށް އަމާޒުހިފާފައިވާ ކަމަށެވެ.
ރާއްޖޭގައި ބާއްވާ އެންމެ ބޮޑު ބައިނަލްއަގުވާމީ ޓްރެވަލް ޓްރޭޑް ޝޯ، ޓްރެވަލް ޓްރޭޑް މޯލްޑިވްސް، ޓީޓީއެމް ފެއަރގައި ބޭރުގެ ގިނަ އަދަދެއްގެ ޓްރެވަލް އެޖެންޓުން ބައިވެރިވެރިވުމަށް ވަނީ ހަމަޖެހިފައެވެ. އަދި އެފަރާތްތަކާއި އެކު ބައްދަލުވުންތައް ބޭއްވުމަށް ދިވެހި ޓުއަރ އޮޕަރޭޓަރުންނަށް ރަޖިސްޓްރީވުމަށްވެސް ވަނީ ހުޅުވާލާފައެވެ. ދިވެހި ޓުއަރ އޮޕަރޭޓަރުން ޓީޓީއެމް ފެއަރއަށް ޒިޔާރަތްކުރުމަށް ރަޖިސްޓްރީވުމަށް އެއްވެސް ފީއެއް ނުނަގާނެ އެވެ.
ނަމަވެސް ބޭރުގެ ޓްރެވަލް އެޖެންޓުންނާއި ބައްދަލުކުރުމަށް ރެޖިސްޓްރީވުމުން އިތުރު ފައިދާތަކެއް ލިބޭނެ ކަމަށް މޯލްޑިވްސް ގެޓަވޭސްއިން ބުނެއެވެ. އެގޮތުން ' ކަނެކްޓް' ސޮފްޓްވެއަރ މެދުވެރިކޮށް މީޓިންތައް އިންތިޒާމްވެގެން ދިއުމާއި، ރަޖިސްޓްރީވާ ފަރާތްތަކަށް ޓީޓީއެމްގެ ގާލާ އިވެންޓުގައި ބައިވެރިވުމުގެ ފުރުސަތު ލިބޭނެ ކަމަށް އެކުންފުނިން ހާމަކުރެއެވެ. ޓްރެވަލް އެޖެންޓުންނާއި ބައްދަލުކުރުމަށް ރަޖިސްޓްރީވުމުގެ ފުރުސަތު ހުޅުވާލާފައިވަނީ، މިމަހުގެ 31ވަނަ ދުވަހުގެ ނިޔަލަށެވެ.
ޓީޓީއެމް މިދިޔަ އަހަރުގެ ފެއަރގައި ދުނިޔޭގެ އެކި ޤައުމުތަކުން 200 ފަރާތަކުން ބައިވެރިވެފައިވެއެވެ. ވިޔަފާރި ބައްދަލުވުންތައް ދަރުބާރުގޭ ދޮށިމޭނާ މާލަމުގައި ކުރިއަށްދިޔައިރު މި ބައްދަލުވުންތަކުގައި 100 އަށްވުރެ ގިނަ އެގްޒިބިޓަރުން ވަނީ ބައިވެރިވެފައެވެ. އޭގެތެރޭގައި ރާއްޖޭގެ މަޝްހޫރު ހޮޓާތަކާއި ރިސޯޓްތައް ހިމެނެއެވެ.
މިދިޔަ އަހަރުގެ ޓީޓީއެމް ފެއަރގައި 4 އިވެންޓެއް ކުރިއަށްގެންގޮސްފައިވެއެވެ.
އެއީ ހޮޓެލިއަރ ސަމިޓަކާއި، ވިޔަފާރި ބައްދަލުވުންތަކަކާއި، ސަޕްލަޔަރ އެކްސްޕޯއެއްގެ އިތުރުން ގާލާ ނައިޓެވެ.