ރާއްޖޭގެ ފިލްމީ ދާއިރާ އިތުރަށް ތަރައްޤީކޮށް ކުރިއެރުވުމަށް ފިލްމީ ދާއިރާގެ ފަންނާނުންނަށް ޚާއްޞަ ފޯރަމްއެއް ބޭއްވުމަށް ނިންމައިފިއެވެ.
މި ފޯރަމް ބޭއްވުމަށް ހަމަޖެހިފައިވަނީ އަންނަ ހޯމަ ދުވަހުގެރޭ 8:45 ގައި އޮލިމްޕަހުގައި ކަމަށް މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖުން މައުލޫމާތުދެއެވެ. ފިލްމީ ދާއިރާގެ ފަންނާނުންނަށް ބާއްވާ މި ފޯރަމްގައި ބައިވެރިވުމުގެ ފުރުޞަތު މިހާރު ވަނީ ހުޅުވާލާފައެވެ. އެގޮތުން އެކްޓަރުންނާއި، ޑައިރެކްޓަރުންނާއި، ޕްރޮޑިއުސަރުންނާއި، އެޑިޓަރުންނާއި، ސްކްރިޕްޓް ލިޔުންތެރިންނާއި ސިނަމެޓޮގްރާފަރުންނަށް މިފޯރަމްގައި ބައިވެރިވުމުގެ ފުރުޞަތު ހުޅުވާލާފައިވާކަމަށާއި، އެނިމޭޓަރުންނާއި، ކޮރެއޮގްރަފަރުންނާއި ނެށުންތެރިން އަދި މޭކަޕް އާޓިސްޓުންނަށް ވެސް މި ފޯރަމްގައި ބައިވެރިވެ ޚިޔާލު ހުށަހެޅުމުގެ ފުރުޞަތު ހުޅުވާލާފައިވާކަމަށް އާރޓްސް މިނިސްޓްރީގެ ދަށުން ހިންގާ ނޭޝަނަލް ސެންޓަރ ފޯރ ދި އާރޓްސްއިން މައުލޫމާތުދެއެވެ.
ފިލްމީ ދާއިރާގެ ފަންނާނުންނަށް ޚާއްޞަ ފޯރަމްއެއް ބޭއްވުމަށް ތައްޔާރުވަމުންދާއިރު، މި ހަފްތާ ތެރޭގައި ވަނީ މިއުޒިކީ ފަންނާނުންނަށް ޚާއްޞަ ފޯރަމެއްވެސް ބާއްވާފައެވެ. އަދި ތަފާތު ފަންނުތަކުގެ ތެރޭގައި ހިމެނޭ ކުރެހުމާއި، ވިޝުއަލް އާރޓްސްގެ ދާއިރާގެ ފަންނުވެރިންނަށް ޚާއްޞަ ފޯރަމްތައްވެސް ކުރިއަށްއޮތް ތަނުގައި ބާއްވާނެކަމަށް އާރޓްސް އެންޑް ކަލްޗަރ މިނިސްޓްރީން ބުނެއެވެ.
ތަފާތު ފަންނުތަކަށް ވަކިވަކިން ޚާއްޞަ ފޯރަމްތައް ބާއްވަމުންދަނީ، ފަންނުވެރިންގެ ކަންބޮޑުވުންތައް އަޑުއަހައި، އެދާއިރާ އިތުރަށް ކުރިއެރުވުމާ ގުޅޭގޮތުން މަޝްވަރާކުރުމަށެވެ.