ދުނިޔޭގެ އެންމެ މަޤްބޫލް ރިސޯޓްތަކަށްދޭ ޓްރެވަލަރސް ޗޮއިސް އެވޯޑު، އަޔާޑާ މޯލްޑިވްސްއަށް ލިބިއްޖެއެވެ.
ޓްރެވަލަރސް ޗޮއިސް އެވޯޑަކީ ދުނިޔޭގެ އެންމެ ބޮޑު ޓްރެވަލް ވެބްސައިޓު، ޓްރިޕް އެޑްވައިޒަރއިން ފަތުރުވެރިންގެ ޚިޔާލުތަކަށް ބެލުމަށްފަހު ކޮންމެ އަހަރަކުވެސް ދެމުން އަންނަ އެވޯޑެކެވެ. ޓްރެވަލަރސް ޗޮއިސް އެވޯޑްސްގެ ދުނިޔޭގެ އެންމެ ފާހަގަކޮށްލެވޭ ރިސޯޓްތަކުގެ ލިސްޓުގައި 25 ތަނެއް ހިމެނެއެވެ. މި ލިސްޓުން އަޔާޑާ މޯލްޑިވްސް އަށް ލިބިފައިވަނީ 25 ވަނަ އެވެ.
ލިސްޓުގެ އެއްވަނަ ލިބިފައިވަނީ ކޯސްޓަރީކާގެ ތުލެމަރ ބަންގަލޯރސް އެންޑު ވިލާރސްއަށެވެ.
ގދ. މަގުއްދުއާގައި ތަރައްޤީކޮށްފައިވާ އަޔާޑާ މޯލްޑިވްސްގައި މަތީ ފެންވަރުގެ 112 ކޮޓަރި ހިމެނޭއިރު އޭގެތެރެއިން 50 ކޮޓަރި އަކީ މޫދުކޮޓަރިއެވެ.
ވަކި ވަކި ސަރަހައްދުތަކުންވެސް އެންމެ ފާހަގަކޮށްލެވޭ ހޮޓާތައް ޓްރިޕް އެޑްވައިޒަރއިން ވަނީ ހޮވާފައެވެ. އެގޮތުން އިންޑިއާ ކަނޑުގެ ސަރަހައްދުން އެންމެ ފާހަގަކޮށްލެވޭ 25 ރިސޯޓު ހޮވާފައިވާއިރު އެ ލިސްޓުގައި ރާއްޖޭގެ ހަތަރު ރިސޯޓެއް ހިމެނެއެވެ. އެއީ އަޔާޑާ މޯލްޑިވްސް، މިލައިދޫ އައިލެންޑު މޯލްޑިވްސް، ބަރޮސް މޯލްޑިވްސް އަދި ކަންދޮޅު މޯލްޑިވްސްއެވެ.
ޓްރިޕް އެޑްވައިޒަރއަކީ ފަތުރުވެރިކަމުގެ ޚިދުމަތްދޭ ރިސޯޓު ހޮޓާފަދަ ތަންތަނުގެ މަޢުލޫމާތު އެއްތަނަކުން ފޯރުކޮށްދޭ މަޝްހޫރު ވެބްސައިޓެކެވެ.