އިންޑިއާގެ މުމްބާއީގައި ބޭއްވި ވަން ވޯލްޑް ޓްރެވެލް މާރކެޓް، އޯޓީއެމްގެ "ބެސްޓް ޑެކޮރޭޝަން ސްޓޭންޑް" ނުވަތަ އެންމެ ރީތި ސްޓޭންޑްގެ އެވޯޑް ރާއްޖެއަށް ލިބިއްޖެއެވެ.
މިދިޔަ އަހަރުވެސް އޯޓީއެމް ފެއަރގައި ރާއްޖޭގެ ސްޓޭންޑަށް ވަނީ "ބެސްޓް ޑެކޮރޭޝަން ސްޓޭންޑް" ނުވަތަ އެންމެ ރީތިކޮށް ފަރުމާކޮށްފައިވަނީ ސްޓޭންޑުގެ އެވޯޑް ލިބިފައެވެ.
މިމަހުގެ 23 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ކުރިއަށްދިޔަ މި ފެއަރއަކީ އިންޑިއާގައި ބާއްވާ މިފަދަ އެންމެ ބޮޑު ފެއަރއެވެ. ރާއްޖެއަށް ލިބުނު އެވޯޑާއި ހަވާލުވީ މި ފެއަރގައި ރާއްޖެ ތަމްސީލުކުރަމުންދާ މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމް.އެމް.ޕީ.އާރު.ސީގެ ފަރާތުންނެވެ.
ފެއަރގެ ރާއްޖޭގެ ސްޓޭންޑު ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި، ދިވެހިންގެ ސަގާފަތް ދައްކުވައިދޭ ގޮތަށެވެ. އަދި ރާއްޖޭގެ ރިސޯޓުތަކުގެ ރީތި މަންޒަރުތައްވެސް ސްޓޯލްއިން ފެންނަން ހުރެއެވެ.
މި ފެއަރގައި އެމް.އެމް.ޕީ.އާރު.ސީއާއިއެކު ރާއްޖޭގެ 15 ކުންފުންޏަކުން 20 ފަރާތެއްވަނީ ބައިވެރިވިއެވެ. މި ފެއަރގައި މައިގަނޑުގޮތެއްގައި އަމާޒުކޮށްފައިވަނީ އިންޑިއާގެ ފަތުރުވެރިން ރާއްޖެއަށް ޒިޔާރަތްކުރާ މިންވަރު އިތުރުކުރުމަށްކަމަށް އެމްއެމްޕީއާރުސީން މައުލޫމާތުދެއެވެ.
އިންޑިއާ ހިމެނެނީ ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ 5 ޤައުމުގެ ތެރޭގައެވެ. އެގޮތުން ހުސްވި އަހަރު އިންޑިއާއިން ރާއްޖެއަށް ނުވަދިހަ ހާހަށްވުރެ ގިނަ ފަތުރުވެރިން ޒިޔާރަތްކުރިއިރު، މިއީ ރާއްޖެއަށް މިދިޔަ އަހަރު ޒިޔާރަތްކުރި ފަތުރުވެރިންގެ ހައެއް ޕޮއިންޓް އެކެއް އިންސައްތައެވެ.