ގިނަ އަދަދެއްގެ މަރުތަކާއި ހިތާމަވެރި ހާދިސާތަކެއް ހިނގަމުންދާތީ ޖެންޑަރ މިނިސްޓަރގެ ކަންބޮޑުވުން ހޯމް މިނިސްޓަރާ ޚިއްސާކުރައްވައިފިއެވެ.
މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް މަރުތަކާ ގުޅޭގޮތުން ކަންބޮޑުވުން ފާޅުކުރެއްވީ ހޯމް މިނިސްޓަރ އިމްރާން އަބްދުﷲއާއެކު ހޯމް މިނިސްޓްރީގައި ބޭއްވި ބައްދަލުވުމެއްގައެވެ.
މި ބައްދަލުކުރެއްވުމުގައި، މިނިސްޓަރ ޝިދާތާ ވަނީ ފާއިތުވެ ދިޔަ މުއްދަތުގެ ތެރޭގައި މި ބާވަތުގެ ގިނަ ހާދިސާތައް ހިނގައިފައިވާކަމަށާއި، މިފަދަ ބައެއް ހާދިސާތަކުގައި އަންހެނުންނާއި ކުޑަކުދިން އަދި އުމުރުން ދުވަސްވީ މީހުން ހިމެނޭކަން ފާހަގަކުރައްވާފައެވެ. އަދި މިފަދަ މައްސަލަތައް ތަޙުޤީޤުކޮށް އިންސާފު ލިބިގެން ދިޔުމަކީ ޖެންޑަރ މިނިސްޓްރީގެ ވެސް މަޞްލަޙަތުގައި ހިމެނޭ ކަމެއްކަން ޝިދާތާ ފާހަގަކުރެއްވިއެވެ.
މީގެ އިތުރުން، ގޭންގް ކުށްތަކުގައި އެކި ފަރާތްތަކުން ކުޑަކުދިން ޝާމިލުކުރާ ކަމަށް ވިދާޅުވެ، އެ ފަދަ ކުށްތަކުން ކުޑަކުދިން ރައްކައުތެރިކުރަން އަޅަން ޖެހޭ ފިޔަވަޅުތަކާ ގުޅޭ ގޮތުން ވެސް މިނިސްޓަރ ޝިދާތާ މަޝްވަރާކުރެއްވިއެވެ.
މިބައްދަލުކުރެއްވުމުގައި މިނިސްޓަރ ޢިމްރާން ދެއްކެވި ވާހަކަފުޅުގައި، ޖެންޑަރ މިނިސްޓްރީގެ ކަންބޮޑުވުންތަކަށް ރިޢާޔަތްކުރައްވައި، ފުރިހަމަ އެހީތެރިކަމާއި އެއްބާރުލެއްވުން ދެއްވާނެ ކަމަށް ވިދާޅުވިއެވެ. އަދި ކުރިމަގުގައި، މި ފަދަ ހާދިސާތައް މަދުކުރުމަށް ގުޅިގެން ކުރެވިދާނެ މަސައްކަތްތަކާ ގުޅޭ ގޮތުން އެ މަނިކުފާނު ޚިޔާލު ބަދަލުކުރެއްވިއެވެ.