އެނބޫދޫ ފިނޮޅު، ތާޖް އެކްޒޯޓިކާ ރިސޯޓްގައި ހިނގި އަލިފާނުގެ ހާދިސާގައި ލިބުނު ގެއްލުންތައް ޓޫރިޒަމް މިނިސްޓަރ ޢަލީ ވަޙީދު ބައްލަވާލައްވައިފިއެވެ.
ރޭ ފަތިހު އެނބޫދޫ ފިނޮޅު، ތާޖް އެކްޒޯޓިކާ ރިސޯޓް އެންޑް ސްޕާ މޯލްޑިވްސްގައި ހިނގި އަލިފާނުގެ ހާދިސާގައި އެ ރިސޯޓްގެ 5 މޫދު ކޮޓަރީގައި އަލިފާން ހިފައި ބޭނުން ނުކުރެވޭ ވަރަށް ވަނީ އަނދާފައެވެ.
އެރިސޯޓަށް ލިބުނު ގެއްލުންތައް ބައްލަވައިލެއްވުމަށް މިއަދު ހެނދުނު އެ ރިސޯޓަށް ކުރެއްވި ޒިޔާރަތުގައި ޓޫރިޒަމް މިނިސްޓަރ ޢަލީ ވަޙީދު ވަނީ ރިސޯޓްގެ މެނޭޖްމަންޓާ ބައްދަލުކުރައްވާފައެވެ. އަދި މިހާދިސާ ހިނގި ވަގުތު އެ ކޮޓަރި ތަކުގައި ތިބި ފަތުރުވެރިންގެ ހާލު ބައްލަވާލައްވައި، ސަރުކާރުން އެފަރާތްތަކަށް ފޯރުކޮށްދެވެން އޮތް އެހީތެރިކަމެއް ފޯރުކޮށްދެއްވާނެކަމަށް މިނިސްޓަރ ވިދާޅުވިއެވެ.
ރޭ ފަތިހު 5 ޖަހާ އެހާކަންހާއިރު ތާޖް އެކްޒޯޓިކާ ރިސޯޓް އެންޑް ސްޕާ މޯލްޑިވްސްގައި ރޯވި އަލިފާންގަނޑު ކޮންޓްރޯލް ކުރެވިފައިވަނީ އޭގެ ގަޑިއިރެއްހާއިރު ފަހުންކަމަށް އެމްއެންޑީއެފުން މައުލޫމާތުދެއެވެ. މި ހާދިސާގައި އެއްވެސް މީހަކަށް އަނިޔާވެފައި ނުވާކަމަށް އެމްއެންޑީއެފުން ބުނެއެވެ.