އިންޝުއަރެންސްގެ ދާއިރާ ބާރު ދުވެލީގައި ކުރިއަރަމުން އަންނަކަމަށާއި، އެގޮތުން މިދިޔަ އަހަރު މި ދާއިރާގެ ފައިދާ 92 އިންސައްތަ އިތުރުވެފައިވާކަމަށް މަރުކަޒީ ބޭންކުގެ ގަވަރުނަރު އަހުމަދު ނަސީރު ވިދާޅުވެއްޖެއެވެ.
އެލައިޑު އިންޝުއަރެންސްގެ 34 ވަނަ އަހަރީ ދުވަހާއި ގުޅުވައިގެން ބޭއްވި ހަފްލާ ޝަރަފްވެރިކޮށްދެއްވާ ވާހަކަފުޅުދައްކަވަމުން މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު ނަސީރު ވިދާޅުވީ، އިންޝުއަރެންސްގެ ދާއިރާއަކީ މިހާރު ރާއްޖޭގެ އިޤްތިޞާދުގައި އެންމެބޮޑަށް ކުރިއަރަމުން އަންނަ ދާއިރާކަމަށެވެ. މިގޮތުން މިދިޔަ އަހަރު ނިމުނު އިރު މިދާއިރާގެ ކުރިއެރުން ނުވަދިހަ ދޭއް އިންސައްތަ އިތުރުވެ، ފައިދާ 136 މިލިއަން ރުފިޔާއަށް އިތުރުވެފައިވާކަން ގަވަރުނަރު ފާހަގަކުރެއްވިއެވެ.
އިންޝުއަރެންސް ދާއިރާގެ ތަފާސް ހިސާބުތައް ދައްކާގޮތުން މިދިޔަ އަހަރު ނިމުނުއިރު، މި ސިނާއަތުގެ ޖުމްލަ އެސެޓް 7 އިންސައްތަ އިތުރުވެ، އެކެއް ޕޮއިންޓް ތިނެއް ބިލިއަން ރުފިޔާއަށް އަރާފައިވާކަމަށް ގަވަރުނަރު ވިދާޅުވިއެވެ.
އެލައިޑުގެ 34 ވަނަ އަހަރީ ދުވަހާއި ގުޅުވައިގެން ބޭއްވި ހަފްލާ ޝަރަފްވެރިކޮށްދެއްވާ ވާހަކަފުޅު ދައްކަވަމުން ގަވަރުނަރު ވަނީ، ޤައުމެއްގެ އިޤްތިސާދު ކުރިއަރައިގެން ދިޔުމުގައި އެޤައުމުގެ މާލީ ދާއިރާ ވަރަށް ބޮޑު ރޯލެއް އަދާކުރާކަން ފާހަގަކުރައްވާފައެވެ.
ރާއްޖޭގައި އިންޝުއަރެންސްގެ ޚިދުމަތް 5 ކުންފުންޏަކުން ދެމުން އަންނައިރު، އިންޝުއަރެންސް ބްރޯކަރުންނާއި، އެޖެންޓުން އިތުރުވަމުންދާކަމަށް އެމްއެމްއޭއިން ބުނެއެވެ.