"ސާފު ރާއްޖެ - އަހަރެންގެވެސް ޒިންމާ" ކެމްޕެއިންގެ ދަށުން ވިލިމާލެއިން 35 ޓަނަށްވުރެ ގިނަ ކުނި ނަގައި ސާފުކޮށްފިއެވެ. މި ހަރަކާތް ފައްޓަވައިދެއްވީ ރައީސުލްޖުމްހޫރިއްޔާގެ ނާއިބު ފައިޞަލް ނަސީމްއެވެ.
މިދިޔަ ޑިސެމްބަރު މަހު ސަރުކާރުން ފަށާފައިވާ މުޅި ރާއްޖެ ސާފުކުރުމުގެ ޤައުމީ ހަރަކާތް "ސާފު ރާއްޖެ - އަހަރެންގެވެސް ޒިންމާ" ގެ ދަށުން ވިލިމާލެ ސާފުކުރުމަށް ކުރިއަށްގެންދިޔަ މި ހަރަކާތް ފައްޓަވައިދެއްވީ ރައީސުލްޖުމްހޫރިއްޔާގެ ނާއިބު ފައިޞަލް ނަސީމެވެ. މި ހަރަކާތް ފައްޓަވައިދެއްވައި ނައިބްރައީސް ވަނީ ވިލިމާލޭގެ އެކި ސަރަޙައްދުތައް ސާފުކުރުމުގައި ޢަމަލީގޮތުން ބައިވެރިވެވަޑައިގެންފައެވެ. އަދި އެމަނިކުފާނު ވަނީ ވިލިމާލޭގައި ހުރި ބައެއް ޕާރކްތަކަށް ޒިޔާރަތް ކުރައްވައި އެތަންތަން ބައްލަވާލައްވާފައެވެ.
މި ހަރަކާތަކީ މާލެ ސިޓީ ކައުންސިލާއި ފުލުހުންގެ އިތުރުން ވޭސްޓް މެނޭޖްމަންޓް ކޯޕަރޭޝަން ގުޅިގެން ކުރިއަށް ގެންދިޔަ ހަރަކާތެކެވެ. ވިލިމާލެ ސާފުކޮށްފައިވަނީ އެ ރަށުގެ އިންސްޕެކްޝަނެއް ހެދުމަށްފަހުގައެވެ. މި އިންސްޕެކްޝަންގައި ވިލިމާލޭގެ ސިނާޢީ ސަރަހައްދާއި ސާފުތާހިރު ނޫންތަންތަން ބަލާފައިވާއިރު މިއީ ކުރިއަށް އޮތްތަނުގައި ވިލިމާލެ ސާފުތާހިރުކޮށް ބޭއްވުމަށްޓަކައި ކުރަމުންދާ މަސައްކަތުގެ ތެރެއިން މަސައްކަތެއްކަމަށް މޭލެ ސިޓީ ކައުންސިލުން މައުލޫމާތުދެއެވެ.
މިހަރަކާތުގައި އެރަށު ގޮނޑުދޮށާއި، ސިނާޢީ ސަރަހައްދުގެ އިތުރުން ޕާރކްތައް ވަނީ ސާފުކޮށްފައެވެ. އަދި ގިނަ ދުވަސްތަކެއް ވަންދެން ސާފު ނުކޮށްހުރި ހުރި ތަންތަން ވަނީ ސާފުކޮށްފައެވެ.
ވިލިމާލެ ސާފުކުރުމުގެ ހަރަކާތަށްފަހު ވާހަކަދައްކަވަމުން މާލެ ސިޓީގެ މޭޔަރ ސިފާ މުޙައްމަދު ވިދާޅުވީ ސާފުކުރަމުން ދިޔައިރު އެންމެ ބޮޑަށް ފާހަގަކުރެވިފައިވާނީ އޮޔާ ދާ ކުނި ވިލިމާލެއަށް ލައްގާކަން ކަމަށާއި، މީގެ ތެރޭގައި ގިނަ އަދަދެއްގެ ޕްލާސްޓިކް ފުޅި ހުރިކަން ފާހަގަކުރެވޭކަމަށެވެ. ސިފާ ވިދާޅުވީ ވިލިގިއްޔަކީ ސާފުތާހިރުކަމުގެ ގޮތުން ނަމޫނާ ރަށަކަށް ހެދޭނެ ރަށެއްކަމަށާއި، މިކަން ކުރުމަށްޓަކައި ގޭގައި ގެންގުޅޭ އެކި ބާވަތުގެ ތަކެތި މަގުތަކަށާއި ޕާރކްތަކަށް ނެރެފައި ނުބެހެއްޓުމަށް އިލްތިމާސްކުރާކަމަށެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ވޭސްޓް މެނޭޖްމަންޓް ކޯޕަރޭޝަންގެ މެނޭޖިން ޑިރެކްޓަރ އާދަމް މުޙައްމަދު ވިދާޅުވީ ސާފުކުރުމުގެ އެކި ހަރަކާތްތައް މިމަހުގެ ތެރޭގައި ކުރިއަށް ގެންދާނެކަމަށެވެ. ވިލިމާލެ ސާފުކުރުމަށް މިއަދު ހިންގި ހަރަކާތުގައި 35 ޓަނުގެ ކުނި ނަގާފައިވާއިރު، މީގެ ތެރޭގައި ގިނައީ ޕްލާސްޓިކް ކަމަށް ވެމްކޯއިން މައުލޫމާތުދެއެވެ.
"ސާފު ރާއްޖެ" ކެމްޕެއިންގެ ދަށުން ކޮންމެ މަހަކު ސާފުކުރުމުގެ އެކި ހަރަކާތްތައް ކުރިއަށް ގެންދިޔުމަށް ނިންމާފައިވެއެވެ. މިގޮތުން މިދިޔަ ޖެނުއަރީ މަހުގައިވެސް ސާފުކުރުމުގެ އެކި ހަރަކާތްތައް ކުރިއަށް ގެންގޮސްފައިވެއެވެ. ވިލިމާލޭގައި ކުރިއަށް ގެންދިޔަ ސާފުކުރުމުގެ މި ހަރަކާތުގައި ވިލިމާލާގައި ޙަރަކާތްތެރިވާ ޖަމިއްޔާ ޖަމާޢަތްތަކާއި، ސްކައުޓުންނާއި، ސްކޫލްތަކާއި، ވެމްކޯގެ މުވައްޒަފުންނާއި، އެރަށުގެ އާންމު ރައްޔިތުން ހިމެނޭހެން 200 އަށްވުރެ ގިނަ މީހުން ބައިވެރިވެފައިވެއެވެ.