ތުރުކީގައި ބާއްވާ އެންމެ ބޮޑު ފަތުރުވެރިކަމުގެ ފެއަރގައި، ބެސްޓް ސްޓޭންޑުގެ އެވޯޑް ރާއްޖެއަށް

ތުރުކީގައި ބާއްވާ އެންމެ ބޮޑު ފަތުރުވެރިކަމުގެ ފެއަރ، އީސްޓް މެޑިޓްރޭނިއަން އިންޓަރނޭޝަނަލް ޓްރެވަލް އެންޑް ޓޫރިޒަމް އެގްޒިބިޝަން، އެމިޓު ފެރގެ 'ބެސްޓް ސްޓޭންޑު'ގެ އެވޯޑް ރާއްޖެއަށް ލިބިއްޖެއެވެ.

ޖެނުއަރީމަހުގެ 31 ވަނަ ދުވަހުން ފެށި މި ފެއާ މިއަދުގެ ނިޔަލަށް ކުރިއަށްދާއިރު، ފެއަރގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމް.އެމް.ޕީ.އާރު.ސީއާއި އެކު ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ 8 ކުންފުންޏަކުން 12 ފަރާތަކުން ބައިވެރިވެފައިވެއެވެ.
ފެއަރގައި ރާއްޖޭގެ ސްޓޭންޑަށް ބޮޑު ސަމާލުކަމެއް ވަނީ ލިބިގެންގޮސްފައެވެ. ރާއްޖޭގެ ސްޓޭންޑުގައި މޯލްޑިވިއަން އައިޑަލް އިން ވިދާލި، ޝަމްވީލް މުޙައްމަދު ވަނީ ދިވެހި ލަވަތައް ހުށަހަޅާދީފައެވެ. އަދި ދިވެހި ލުއި ކެއުންތަކުގެ ރަހަ ބަލާލުން ފަދަ ހަރަކާތްތައްވެސް ރާއްޖޭގެ ސްޓޭންޑުގައި ވަނީ ކުރިއަށްގެންގޮސްފައެވެ.
މި ފެއަރގެ ރާއްޖޭގެ ސްޓޭންޑުން ދިވެހިރާއްޖޭގެ ގުދުރަތީ ރީތިކަން ދައްކުވައިދޭ ފޮޓޯތައް ފެންނަން ހުރެއެވެ.
މިއަހަރުގެ އެމިޓު ފެއަރގައި 85 ޤައުމަކުން 1065 އެގްޒިބިޓަރުން ބައިވެރިވެއެވެ. އަދި މި ފެއަރއަށް 50،000 މީހުން ޒިޔާރަތްކުރާނެ ކަމަށް ލަފާކުރެވޭ ކަމަށް ފެއަރ އިންތިޒާމް ކުރާ ފަރާތުން ހާމަކުރެއެވެ.