ރޭ ދަންވަރު މާލޭގައި ސައިކަލު ރޭސް ޖަހަން އުޅެނިކޮށް އެކްސިޑެންޓް ވި ދެކުދިންގެ ހާލުވެސް ރަނގަޅުކަމަށް އައިޖީއެމްއެޗްއިން ވިދާޅުވެއްޖެއެވެ.
އައިޖީއެމްއެޗްގެ މީޑިއާ އޮފިޝަލް ޕީއެސްއެމް ނިއުސްއަށް މިއަދު ވިދާޅުވީ އަނިޔާ ލިބުނު ދެ ކުދިންގެ ތެރެއިން އެއް ކުއްޖަކު ގެއަށް ދޫކޮށްލާފައިވާކަމަށާއި އަނެއްކުއްޖާގެ ހާލުވެސް ރަނގަޅުވަމުން އަންނަކަމަށެވެ.
ފުލުހުން ވިދާޅުވީ ރައްޔިތުން މަޖިލިސް ކުރާ އިދާރާ ކައިރިން އެކްސިޑެންޓެއް ހިނގައިގެން އުޅޭ ކަމުގެ މަޢުލޫމާތު ރޭ 1:00ހާއިރު އެ އިދާރާއަށް ލިބިފައިވާ ކަމަށެވެ. އެ އެކްސިޑެންޓުގައި އަނިޔާވެފައިވަނީ އުމުރުން 16 އަހަރުގެ ދެ ފިރިހެން ކުދިންނަށް ކަމަށް ފުލުހުން ވިދާޅުވިއެވެ.
ފުލުހުން ވިދާޅުވެފައިވަނީ އެކްސިޑެންޓު ހިނގަން ދިމާވީ ދެ ފިރިހެން ކުއްޖަކު ދުއްވާފައި ދިޔަ ސައިކަލު އެހެން ސައިކަލެއް އޯވާޓޭކް ކުރަން އުޅެނިކޮށް ކޮންޓްރޯލް ނުވެ ޕާކުކޮށްފައި އޮތް ކާރެއްގައި ޖެހުމުން ކަމަށެވެ.
އެކްސިޑެންޓުގައި ދެ ކުޑަކުދިންނަށް ވަރަށް ބޮޑެތި އަނިޔާތަކެއް ލިބިފައިވާ ކަމަށާއި އެނެއް ސައިކަލް ދުއްވަން އިން އުމުރުން 26 އަހަރުގެ ފިރިހެންމީހާއަށް މާ ބޮޑު އަނިޔާއެއް ލިބިފައިނުވާކަމަށްވެސް ފުލުހުން ވިދާޅުވިއެވެ.