ހިލޭ ހެލްމެޓް ބެހުމަށް ކުރިއަށްގެންދާ ހޭލުންތެރިކުރުމުގެ ޕްރޮގްރާމް އަންނަ ބުރާސްފަތި ދުވަހު ފެށުމަށް ހަމަޖެހިފައިވާކަމަށް ޓްރާންސްޕޯޓް އޮތޯރިޓީން ވިދާޅުވެއްޖެއެވެ. މި ޕްރޮގްރާމް މީގެ ކުރިން ފެށުމަށް ހަމަޖައްސާފައިވަނީ މިދިޔަ ހޮނިހިރި ދުވަހުއެވެ.
މާލެ ސަރަޙައްދަށް 3000 ހެލްމެޓް ބެހުމަށް ހަމަޖެހިފައިވާއިރު މިގެ ތެރެއިން 2500 ހެލްމެތް ބެހުމަސް ހަމަޖެހިފައިވަނީ ބޮޑެތި މީހުންނަށެވެ. ހިލޭ ހެލްމެޓް ބެހުމުގެ ޕްރޮގްރާމް އަންނަ ބުރާސްފަތި ދުވަހު މޯލްޑިވްސް ނެޝަނަލް ޔުނިވަރސިޓީގައި ކުރިއަށް ގެންދިޔުމަށް ވަނީ ހަމަޖައްސާފައެވެ. މިގޮތުން ޖުމުލަ ހަތަރު ސެޝަންއަކަށް ބަހާލައިގެން މި ޕްރޮގްރާމް ކުރިއަށް ގެންދާއިރު ކޮންމެ ސެޝަންއެއްގައި 300 މީހުން ބައިވެރިކުރުމަށް ހަމަޖެހިފައިވާކަމަށް ޓްރާންސްޕޯޓް އޮތޯރިޓީން ވިދާޅުވެއެވެ. މި ގޮތުން މި ޕްރޮގްރާމްގެ ފުރަތަމަ ބުރު ކުރިއަށް ގެންދިޔުމަށް ގެންދަނީ މިމަހުގެ 28 ވަނަ ދުވަހާއި މާރޗް މަހުގެ 2 ވަނަ ދުވަހު ހެނދުނާއި ރޭގަނޑުގެ ވަގުތުތަކުގައެވެ.
މިޕްރޮގްރާމްގައި ބައިވެރިވުމަށް އެދި ރަޖިސްޓަރ ވުމަށް ޚާއްސަ ޕޯޓަލްއެއް ޤާއިމްކުރުމުން އޭގައި 2500 މީހުން ރަޖިސްޓަރ ވެފައިވާކަމަށް ޓްރާންސްޕޯޓް އޮތޯރިޓީން ވިދާޅުވެއެވެ.
ސަރުކާރުގެ ފުރަތަމަ 100 ދުވަހު ތެރޭގައި 5000 ހެލްމެޓް ބެހުމަށް ހަމަޖެހިފައިވާއިރު މީގެ ތެރެއިން 3500 ހެލްމެޓްއަކީ ޔުނެސެފްއިން ހަދިޔާކޮށްފައިވާ ހެލްމެޓްތަކަކެކެވެ. ބާކީ1500 ހެލްމެޓަކީ އަމިއްލަފަރާތަކާ ހަވާލުކޮށްގެން ގެނެސްފައިވާ ހެލްމެޓްތަކެއްކަމަށް ޓްރާންސްޕޯޓް އޮތޯރިޓީން ވިދާޅުވެއެވެ.
ހެލްމެޓް ބެހުމަށް ކުރިއަށްގެންދާ ޕްރޮގްރާމްގައި މަގުތަކުގެ އަދަބުތކާއި މަގުތަކުގައި ވެހިކަލްތައް ގެންގުޅެންޖެހޭނެ ގޮތްތަކާއި އުޅަނދު ދުއްވާނެ ގޮތްތައް ކިޔާދިނުމަށް ވަނީ ހަމަޖެހިފައެވެ. ޓްރާންސްޕޯޓް އޮތޯރިޓީން ވިދާޅުވީ މިޕްރޮގްރާމް ފުރިހަމަކުރުމުން ސެޓްފިކެޓާއެކު އެމީހަކަށް ހެޔޮވަރުގެ ހެލްމެޓެއް ލިބޭނެކަމަށެވެ.