ސަރުކާރު މުއައްސަސާއެއްގެ ޒިންމާދާރު ވަޒީފާއެއްގައި އުޅުއްވާ ބޭފުޅެއްގެ ނަމުގައި، މީހަކަށް ފޯނުން ގުޅައި އޮޅުވާލައިގެން ގިނަޢަދަދެއްގެ ފައިސާ ފޭރިގެންފިއެވެ.
ފުލުހުން މަޢުލޫމާތުދެއްވާގޮތުގައި އޮޅުވާލައިގެން ގުޅި މީހާވަނީ، މާލެއިން 3 ފޮށިގަނޑެއް މީހަކުހަވާލު ކުރާނެކަމަށާއި އެ ތަކެތި ހަވާލުކުރުމުން އެފޮށިގަނޑު ހިފައިގެންދާ މީހާއަށް އޭގެ "ޝިޕިން ޗާޖެއްގެ ގޮތުގައި" 13500 ރުފިޔާ ޙަވާލުކުރުމަށް އެދިފައިކަމަށެވެ. މިމައްސަލަ ފުލުހުންނަށް ހުށަހަޅާފައިވާކަން ޙާމަކުރައްވައި ޢާއްމުން ސަމާލުވުމަށް ފުލުހުން އިލްތިމާސްކުރައްވައެވެ.
ފުލުހުން ވިދާޅުވީ މިމައްސަލާގައި ހިމެނޭ ފޮށިގަނޑުގެނައި މީހާއަށް އޮޅުވާލައިގެން ފޯނުކުރި މީހާބުނި ޢަދަދަށް ފައިސާ ޙަވާލުކުރުމަށްފަހު، ފޯނު ކުރިކަމަށް ބުނާ މީހާއާ ބައްދަލުކުރުމުން އެއީ އޭނާގެ އެއްޗެއް ނޫންކަމަށް ބުނެފައިވާކަމަށެވެ. މި 3 ފޮށިގަނޑު ބަލައިފާސްކުރިއިރު އޭގައިހުރީ ގަލާއި ކުނި ބުނިކަމަށްވެސް ފުލުހުން ވިދާޅުވެއެވެ.
މިއީ މަކަރާއި ޙީލަތުން ފައިސާ ހޯދުމުގެގޮތުން ކޮށްފައިވާ ކަމެއްކަމަށް ބެލެވޭކަމަށާ އެހެންކަމުން ރަށްޔިތުން މިކަމަށް ސަމާލުވުމަށް ފުލުހުން އިލްތިމާސްކުރައްވައެވެ. އެގޮތުން އެއްވެސްމީހަކު ފޯނުން ގުޅާފައި ގިނަ ޢަދަދަކަށް ފައިސާ ދީފައި ޕާރުސަލަކާ ހަވާލުވުމަށް އެދޭނަމަ އެފައިސާ ނުދީ އެކަން ފުލުހުންނަށް ރިޕޯޓްކުރުމަށް ފުލުހުން އިލްތިމާސްކުރައްވައެވެ.