ގެއްލިގެން ހޯދަމުންދާ ޝިމާ ނާފިޒް ހޯދުމުގެ މަސައްކަތަތުގައި ސިކްސް ސެންސެސް ރިސޯޓް ހިމެނޭ ސަރަޙައްދުގެ ކަނޑުގެ ސަރަޙައްދުން ވައިގެމަގުން ފަސް މޭލުގެ ބޮޑު ސަރަޙައްދެއް މިއަދު ބަލާފައިވާކަމަށް އެމްއެންޑީއެފުން ވިދާޅުވެއްޖެއެވެ.
މިދިޔަ ހުކުރު ދުވަހު ލ.ކައްދޫ އިން ފުރައިގެން ދަތުރުކުރި ޑިންގީއެއް ބަންޑުން ޖަހާލައި އެއިން ދަތުރުކުރަމުންދިޔަ ޢުމުރުން 19އަހަރުގެ އަންހެންމީހާ ހޯދުމުގެ މަސައްކަތް އެމްއެންޑީއެފުން ދަނީ ހުއްޓުމެއް ނެތި ކުރަމުންނެވެ. ޑިންގީއިން ގެއްލުނު އަންހެންމީހާ ހޯދުމަށް އެމްއެންޑީއެފްގެ ސެންޓްރަލް އޭރިއާއިން ހިންގާ ޚާއްސަ އޮޕަރޭޝަނުގައި ސިފައިން ހުއްޓުމެއްނެތި މަސައްކަތް ކުރަމުންދާކަމަށް އެމްއެންޑީއެފުން ވިދާޅުވެއެވެ. އެމްއެންޑީއެފުން ވިދާޅުވީ މިހާތަނަށް ބެލިބެލުމުގައި ގެއްލުނު އަންހެންމީހާއާއި ބަންޑުންޖަހާލި ޑިންގި ވެސް މިހާތަނަށް ފެނިފައިނުވާކަމަށެވެ.
ގދ. ފިޔޯރީ ޢުމުރުން 19އަހަރުގެ ޝިމާ ގެއްލިފައިވަނީ މިދިޔަ ހުކުރު ދުވަހުގެރޭ އޭނާއާއި އިތުރު މީހަކު ލ.ކައްދޫއިން ފުރައިގެން އެއަތޮޅު މާމެންދޫއަށް ދަތުރު ކުރަމުންދިޔަ ޑިންގީ ގާދޫ ކަނޑުއޮޅިއަށް ބަންޑުން ޖަހާލުމާ ގުޅިގެންނެވެ. ޝިމާ ހޯދުމުގެ މަސައްކަތް ވަޔާއި ކަނޑުގެ މަގުން ސިފައިންއަންނަނީ ކުރަމުންނެވެ. އަދި މިމަސައްކަތުގައި މިވަގުތު ރާއްޖޭގައި ލިބެންހުރި ހުރިހާ ވަސީލަތެއްގެ ބޭނުން ކުރަމުންދާ ކަމަށްވެސް އެމްއެންޑީއެފުން ވިދާޅުވެއެވެ.
އެގޮތުން މި މަސައްކަތުގައި އެމް.އެންޑީ.އެފްގެ ޑައިވަރުންނާއި، ސްނޯކްލިންގ ޓީމުތަކާއި އެފް.އައި.ސީއާއި، ހާބަރ ކްރާފްޓާއި، ގަލްފް ކްރާފްޓާއި، ސިކްސް ސެންސަސް ރިސޯޓާއި، ލ.ގަމު ރައިވެރީސް ގެސްޓް ހައުސްގެ ފަރާތުން އަންނަނީ ހަރަކާތްތެރިވަމުންނެވެ. އަދި ހެލިކޮޕްޓަރު ބޭނުންކޮށްގެންނާއި އެމް.އެން.ޑީ.އެފްގެ ފާސްޓަރ އިންޓަރސެޕްޓަރ ކްރާފްޓް ލޯންޗުގެ ނައިޓް ވިޝަން ކެމެރާގެ އެހީގައި ކަނޑުގެ ސަރަޙައްދު ބަލާފައިވާކަމަށްވެސް އެފަރާތުން ވިދާޅުވެއެވެ. މީގެއިތުރުން ޝިމާ ގެއްލުނު ކަމަށް ބެލެވޭ ސަރަޙައްދުގައި ކޯސްޓް ގާޑު ޝިޕް ޝަހީދު ޢަލީ ހަރަކާތްތެރިވަމުންދާ ކަމަށާއި، މި މަސައްކަތުގައި ޑައިވިންގ ރޮބޯޓް ބޭނުންކުރަމުންދާކަމަށްވެސް އެމްއެންޑީއެފުން ވިދާޅުވެއެވެ.
މިދިޔަ ހުކުރު ދުވަހުގެ އިރުއޮއްސުނު ވަގުތު ހިނގި މި ޙާދިސާގައި ޑިންގީ ބަންޑުން ޖަހާލުމުން އޭގައި ހުރި ފިރިހެން މީހާ ފަތާފައި ގޮސް ސިކްސް ސެންސަސް ރިސޯޓަށް އަރާފައިވާކަމަށް އޭނާބުނެއެވެ. އަދި ޑިންގީ ބަނޑުން ޖަހާލާފައިވަނީ ޕެޓްރޯލް ހުސްވެގެން ޕެޓްރޯލް އަޅަމުންދަނިކޮށް ޖެހި ރާޅަކާއެކުކަމަށްވެސް އޭނާވަނީ ބުނެފައެވެ.