ޤައުމީ ދިފާޢީ ބާރުގެ އަންހެން ސިފައިންގެ ޚިދުމަތަށް 30 އަހަރު ފުރުން ފާހަގަކުރުމުގެ ގޮތުން ޚާއްޞަ ހަރަކާތްތަކެއް ކުރިއަށް ގެންގޮސްފިއެވެ.
މި ދުވަސް ފާހަގަ ކުރުމުގެ ގޮތުން ވަނީ ބަޑިބޭހުގެ ޚާއްޞަ ކުޅިވަރުތަކެއް ސެނަހިޔަ ހޮސްޕިޓަލް ކުރިމަތީ އޮންނަ ހުސް ބިން ސަރަޙައްދުގައި ވަނީ ކުރިއަށް ގެންގޮސްފައެވެ. ބަޑިބޭހުގެ ހަރަކާތްތައް ކުރިއަށް ގެންގޮސްފައިވަނީ ފަސް މިނެޓަށެވެ. މި ހަރަކާތް ބަލާލުމަށްޓަކައި އެ ސަރަޙައްދަށް ގިނަ އަދަދެއްގެ އާއްމު ރައްޔިތުން ޖަމާވިއެވެ.
މިއަދު ހަވީރު ވަނީ އަންހެން ސިފައިންނާއި ސިފައިންގެ ޢާއިލާތަކުން ބައިވެރިވެގެން ކަޅުތުއްކަލާކޮށީގައި ވަނީ ކުޅިވަރުގެ ހަރަކާތްތަކެއް ހިންގާފައެވެ. އަދި މިމަހު 22 ވަނަ ދުވަހު އަންހެން ސިފައިންނަށް ޚާއްސަކޮށްގެން ރޫޓު މާޗެއް ބޭއްވުމަށް ވަނީ ހަމަޖެހިފައެވެ.
ރާއްޖޭގައި އަންހެން ސިފައިންގެ ޚިދުމަތް ފެށުމަށްޓަކައި އެކަމަށް ހުޅުވާލީ މީގެ 57 އަހަރު ކުރިން 1962ގައެވެ. ނަމަވެސް އަންހެން ސިފައިންގެ ޚިދުމަތް ދިވެހި އަސްކަރިއްޔާގައި އުފެދިގެންދިޔައީ 65 އަންހެން ސިފައިންނާއެކު 1989 ވަނަ އަހަރުގެ މާރޗު 1 ވަނަ ދުވަހުއެވެ. އެއީ 1988ވަނަ އަހަރުގެ ނޮވެމްބަރު މަހުގެ ތިނެއްގެ އުދުވާނީ ޙަމަލާއަށްފަހު، ޤައުމީ ސަލާމަތީ ކަންކަން ހަރުދަނާ ކުރުމުގެ ގޮތުން އޭރުގެ ސަރުކާރުން އެޅުއްވި ފިޔަވަޅަކާ ގުޅިގެންނެވެ.