ބުރިޖާއި ހައިވޭގައި ދުއްވާ ވެހިކަލްތަކުގެ ސްޕީޑް ބެލުމުގެ މަސައްކަތް މި މަސް ނިމުމުގެ ކުރިން ހޭންޑް ހެލްޑް ކެމެރާ ބޭނުންކޮށްގެން ފަށާނެކަމަށް ޓްރާންޕޯޓް މިނިސްޓްރީން ވިދާޅުވެއްޖެއެވެ.
ޕީއެސްއެމްނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަޙްމަދު އާދިލް ވިދާޅުވީ ބުރިޖު ހުރަސްކޮށް ބާރު ސްޕީޑުގައި ވެހިކަލް ދުއްވާ ފަރާތްތައް މި ކެމެރާތައް ބޭނުންކޮށްގެން ދެނެގަނެ އެފަރާތްތަކާމެދު ފިޔަވަޅު އެޅުމުގެ މަސައްކަތް ވަރަށް އަވަހަށް ފެށޭނެ ކަމަށެވެ. އަދި ކުރިއަށްއޮތް ދެތިން މަހެއްގެ ތެރޭގައި ބްރިޖް މަތީގައި ސްޕީޑް ކެމެރާ ހަރުކޮށް ބާރަށް ވެހިކަލް ދުއްވާ ފަރާތްތައް ދެނެގަނެ އެފަރާތްތަކާމެދު ފިޔަވަޅުއަޅަން ފަށާނެ ކަމަށެވެ.
ބުރިޖާއި ހައިވޭގައި ސްޕީޑް ކެމެރާ ހަރުކުރުމާއެކު ގެންނަން ޖެހޭ ބައެއް ބަދަލުތައް ހުރިކަން ފާހަގަކުރައްވައި ސްޓޭޓް މިނިސްޓަރ ވިދާޅުވީ މިހާރު ބައެއް ވެހިކަލްތަކުގައި ހުންނަ ނަންބޯޑުތައް ހުރިގޮތުން ކެމެރާތަކަށް ސާފުކޮށް މަންޒަރު ނުފެންނަ ކަމަށާ އެހެންކަމުން ޕްލާސްޓިކް ނަންބޯޑު ތަކަށް ބަދަލުގެންނަން ޖެހޭކަމަށް.
"ޕްލާސްޓިކް ބޯޑުގެ ސަބަބުން ބައެއް ފަހަރު ދަޅަ އެޅުން ފަދަ ކަންތައްތަކުން ސްޕީޑް ކުރާ ފަރާތްތައް ކުގެ ސައިކަލް ނަމްބަރު ނުވަތަ ކާރު ނަންބަރު ސާފެއް ނުވޭ.ވަރަށް ބޮޑު ބަދަލުތަކެއް ގެންނަން ޖެހޭ. ބަދަލު ގެންނަމުންދާނީ އެކި މަރުހަލާތަކަށް ބަހާލައިގެން. އެކި މަރަހަލާތަކަށް ބަހާލައިގެން މިކަން ކުރިއަށް ގެންދިޔިނަމަވެސް މިހާރުން މިހާރަށް ކެމެރާތައް ހަރުކުރަންޖެހޭކަމަށް." އާދިލް ވިދާޅުވިއެވެ.
ބުރިޖާއި ހައިވޭގައި ސަރވައިލަންސް ކެމެރާ ހަރުކުމަށްޓަކައި ކުރަންޖެހޭ ޓެކްނިކަލް ސަރވޭއާއި، ދިސާރާގެ މަސައްކަތްވެސް ވަނީ ނިންމާލާފައެވެ.
ބުރިޖާއި ހައިވޭމަތީގައި ސްޕީޑް ކެމެރާއާއި ސަރވައިލަންސް ކެމެރާ ހަރުކުރުމަށް މިއަހަރުގެ ބަޖެޓްގައިވެސް ވަނީ ހިމަނާފައެވެ. މިމަސައްކަތް ކުރަމުންދަނީ ފުލުހުންނާއި، ޓްރާންސްޕޯޓް މިނިސްޓްރީއާއި ހައުސިންގ މިނިސްޓްރީ ގުޅިގެންނެވެ.