އަތޮޅު ފެރީ ނިޒާމްގެ ޚިދުމަތް މިހާރަށް ވުރެ ބޮޑަށް ހަރުދަނާކޮށް ފެންވަރު ރަނގަޅު ފެރީގައި ދަތުރުކުރެވެނެ އިންތިޒާމް ހަމަޖެއްސުމުގެ މަސައްކަތްކުރަމުންދާކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަޙްމަދު އާދިލް ވިދާޅުވީ، ސަރުކާރުން އަތޮޅުތެރޭގައި ދެމުންދާ ފެރީގެ ޚިދުމަތުގެ ސަބަބުން ރައްޔިތުންނަށް ގިނަ ފައިދާ ތަކެއް ކުރަމުންދާކަމަށެވެ.
ނަމަވެސް އަދިވެސް އަތޮޅު ފެރީ ނިޒާމްގެ ޚިދުމަތް ހަރުދަނާ ކުރަންޖެހޭކަމަށާއި ފެރީގެ ޙިދުމަތުގައި މިހާރުވެސް ރައްޔިތުންނަށް އުނދަގޫވާ ކަންކަން ހުރިކަމަށެވެ.
މިގޮތުން ރައްޔިތުންގެ އެންމެ ބޮޑު ޝަކުވާއަކަށް ވެފައިވަނީ އަތޮޅުގެ ވެރިކަން ކުރާ ރަށަށް ސީދާ ފެރީއެއް ނެތުމުގެ މައްސަލަކަމަށް ސްޓޭޓް މިނިސްޓަރ އާދިލް ވިދާޅުވިއެވެ. އާދިލް ވިދާޅުވީ، މިކަން ހައްލުކުރަން ބަލާއިރު، ގޮންޖެހުންތަކެއް އެބަހުރިކަމަށާއި، މިގޮތުން ބައެއް ހާލަތްތަކުގައި އަތޮޅުގެ ވެރިކަން ކުރާރަށް ދާ މީހުންގެ ނިސްބަތް މަދުވުމަކީ މިކަން ހައްލުކުރުމަށް އޮތް އެއް ސަބަބުކަމަށް އޭނާ ފާހަގަކުރެއްވިއެވެ.
ޓްރާންސްޕޯޓް މިނިސްޓްރީން ވިދާޅުވީ، އަތޮޅު ފެރީ ނިޒާމާއި އެކު މާލެއިން އަތޮޅުގެ ރަށްތަކަށް ފުރާ ފެރީތައް ލަފާ ފުރުމަށްވެސް ލުއިފަސޭހަ ގޮތްތަކެއް ހޯދައިދިނުމުގެ މަސައްކަތް ކުރަމުންދާކަމަށެވެ.
ރާއްޖޭގެ ބޮޑު ސަރަހައްދެއްގައި ފެރީގެ ޚިދުމަތް ދެމުންދަނީ އެމްޓީސީސީންއެވެ. މީގެ އިތުރުން އެމްޓީސީސީއާއިއެކު އެމްޕީއެލްއާއި ވަރމިލިޔަން އިންޓަނޭޝަނަލް އިންވެސް ދަނީ އަތޮޅުގެ ރަށްތަކަށް ފެރީގެ ޚިދުމަތް ދެމުންދެއެވެ.