ގަލޮޅު ލޯލާ ފިހާރަ ކައިރީގައި ހުރި ގުދަނެއްގެ ތެރޭގައި ދެމީހަކަށް ތޫނުއެއްޗަކުން ހަމަލާދީފިއެވެ.
ފުލުހުން ވިދާޅުވީ މިހާދިސާ ހިނގީފައިވަނީ މިއަދު މެންދުރުފަހު 14:41 ހާއިރުކަމަށެވެ. މިހާދިސާގައި ޒަހަމްވެފައިވަނީ އުމުރުން 25 އަހަރުގެ ބަނގުލަދޭޝްގެ ފިރިހެނަކާއި ޢުމުރުން 38 އަހަރުގެ ދިވެއްސަކަށްކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ ޒަޚްމްވެފައިވާ ދެ މީހުންނަށް ވެސް އައިޖީއެމްއެޗުގައި ފަރުވާދީފައިވާކަމަށާ، އެއްވެސް މީހަކަށް ސީރިއަސް ޒަޚަމެއް ލިބިފައިނުވާކަމަށެވެ. މިހާދިސާ ހިނގާފައިވަނީ އެދެ މީހުންގެ ދެމެދުގައި ހިނގި މާރާމާރީއެއްގެ ސަބަބުން ކަމަށާއި އެމައްސަލައިގެ ތުހުމަތުގައި 38 އަހަރުގެ މީހާ ހައްޔަރުކޮށްފައިވާ ކަމަށް ވެސް ފުލުހުން ވިދާޅުވެއެވެ.
މިހާދިސާގެ އިތުރުން މާލޭގައި ޕާކްކުރަން އުޅުނު ޓެކްސީއެއްގެ ފުރޮޅު އަރައި މަގުހުރަސް ކުރަން އުޅުނު މީހެއްގެ ކަނާތު ފައިގެ އިނގިއްޔެއްގެ ބައެއް ވަނީ ވަކިވެފައެވެ. ފުލުހުން ވިދާޅުވީ މިހާދިސާ ހިނގާފައި ވަނީ މިއަދު މެންދުރުފަހު 15:40 އެހައިކަންހާއިރު ބޭންކް އޮފް ސިލޯން ކައިރިން ކަމަށެވެ.
މަގު ހުރަސްކުރަން އުޅެނިކޮށް އިނގިލީގެ ބައެއް ވަކިވި މީހަކީ އުމުރުން 48 އަހަރުގެ ފިރިހެނެކެވެ.
ފުލުހުން ވިދާޅުވީ އެމީހާއަށް އޭޑީކޭ ހޮސްޕިޓަލްގައި ފަރުވާދީފައިވާކަމަށެވެ.