މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ހިންގަމުންދާ ތަރައްޤީގެ މަޝްރޫޢުތަކުގެ ތެރެއިން 8 މަޝްރޫޢެއް މަޑުޖެހިފައިވާކަމަށް އެކުންފުނިން ވިދާޅުވެއްޖެއެވެ. ސަރުކާރުން ވަނީ ތަރައްޤީގެ 20 މަޝްރޫޢެއްގެ މަސައްކަތް އެމްޓީސީސީއާ ހަވާލުކޮށްފައެވެ.
ރާއްޖޭގައި ކުރިއަށްގެންދާ ތަރައްޤީގެ މަޝްރޫޢުތަކުގެ ތެރެއިން އުމްރާނީ ތަރައްޤީގެ އެންމެ ގިނަ މަޝްރޫޢޫތައް ކުރިއަށްގެންދާ އެއް ކުންފުންޏަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއެވެ.
އެމްޓީސީސީން ކުރިއަށްގެންދާ އުމްރާނީ ތަރައްޤީގެ މަޝްރޫޢޫތަކާބެހޭ މަޢުލޫމާތު ނޫސްވެރިންނާ ޙިއްޞާކުރައްވަމުން އެ ކުންފުނީގެ ކޮންސްޓްރަކްޝަން ޕްރޮޖެކްޓް މެނޭޖްމަންޓްގެ އެސިސްޓެންޓް ޖެނެރަލް މެނޭޖަރ އަޙްމަދު ލަޠީފް ވިދާޅުވީ އެކުންފުނިން މިވަގުތު 20 މަޝްރޫއެއްގެ މަސައްކަތް ކުރަމުންދިޔަނަމަވެސް މީގެ ތެރެއިން 8 މަޝްރޫޢެއް އެކި ސަބަބުތަކާހެދި މަޑުޖެހިފައިވާކަމަށެވެ. މީގެ ތެރެއިން ގިނަ މަޝްރޫޢުތަކުގެ މަސައްކަތް މަޑުޖައްސާލާފައިވަނީ މަޝްރޫޢުގެ ޑިޒައިނަށް ބަދަލުގެންނަން ރައްޔިތުން އެދޭތީކަމަށް އޭނާ ވިދާޅުވިއެވެ.
އެމްޓީސީސީގެ އެސިސްޓެންޓް ޖެނެރަލް މެނޭޖަރ އަޙްމަދު ލަތީފް ވިދާޅުވީ މިވަގުތު އެކުންފުނިން އެންމެ ގިނައިން ކުރަމުންދަނީ ރަށްތަކުގެ ބަނދަރު ހެދުމާއި ގޮނޑުދޮށް ހިމާޔަތް ކުރުމުގެ މަޝްރޫޢުތަކުގެ މަސައްކަތްކަމަށެވެ.
""ހުއްޓިފައި ހުރި މަސައްކަތްތަކުގެ ތެރޭގައި އެންމެ ގިނައީ ބަނދަރުގެ މަސައްކަތް. މައިގަނޑު ގޮތެއްގައި ޑިޒައިންނަށް ބަދަލުގެނައުމުގެ ސަބަބުން މަޑުޖެހިފައިވަނީ"ލަޠީފް ވިދާޅުވިއެވެ.
ނޫސްވެރިންނަށް މައުލޫމާތުދެއްވަމުން އެމްޓީސީސީގެ ސީއީއޯ ޙަސަން ޝާހް ވިދާޅުވީ އެކުންފުނީގެ ދަރަނީ ޢަދަދު 700 މިލިއަން ރުފިޔާއަށް އަރާކަމަށާއި، މި ފައިސާ އަނބުރާ ދެއްކުމަށް 10 ވަރަކަށް އަހަރު ހޭދަވާނެކަމަށް ބެލެވޭކަމަށެވެ. އޭނާ ވިދާޅުވީ އެމްޓީސީސީގެ ލޯނު އަބުރާ ދައްކާނީ އެކުންފުނީގެ ފައިސާއިން ކަމަށާއި، އެކަމަށް ސަރުކާރުން ފައިސާ ނުހޯދާނެކަމަށެވެ. އެގޮތުން މިމަހުވެސް އެމްޓީސީސީން ވަނީ ލޯނުގެ ގޮތުގައި 30 މިލިއަން ރުފިޔާ އެކި ފަރާތްތަކަށް ދައްކާފައެވެ.
"އަޅުގަނޑު މިތަނުގެ ސީއީއޯ އަކަށް އައިސް މިތަން ބަލާލިއިރު އެބައޮތް 746 މިލިއަނެއްހާ ރުފިޔާގެ ލޯނެއް. އެކަމަކު އިރާދަ ކުރެއްވިއްޔާ ލޯނެއް އޮތުމަކީ މާބޮޑު މައްސަލަ އެއް ނޫން" އެމްޓީސީސީގެ ސީއީއޯ ވިދާޅުވިއެވެ.
އެމްޓީސީސީން ވިދާޅުވީ މިއަހަރުވެސް އެކުންފުނިން 700 މިލިޔަން ރުފިޔާގެ ޢުމްރާނީ ތަރައްޤީގެ މަޝްރޫޢުތަކާ ހަވާލުވުމަށް ނިންމާފައިވާކަމަށެވެ. އެމްޓީސީސީން އާއްމުކޮށް ކުރިއަށްގެންދާ މަޝްރޫއުތަކުގެ ތެރޭގައި ބަނދަރު ހެދުމާއި، މަގު ހެދުމާއި، އެއަރޕޯޓްގެ އެޅުމާއި ނަރުދަމާގެ މަސައްކަތްތަކުގެ އިތުރުން ގޮނޑުދޮށް ހިމާޔަތްކުރުމުގެ މަސައްކަތް ހިމެނެއެވެ.