އިސްލާމިކް ރިޕަބްލިކް އޮފް ޕާކިސްތާން ދުވަސް ފާހަގަކުރުމަށް ރާއްޖޭގައި ހުންނަ ޕާކިސްތާނުގެ އެމްބަސީގައި ދިދަނެގުމުގެ ޚާއްސަ ރަސްމިއްޔާތެއް ބާއްވައިފިއެވެ.
މި ރަސްމިއްޔާތުގައި ވަނީ މިދުވަސް ފާހަގަކުރުމަށް ކޭކެއްވެސް ފަޅާފައެވެ. މި ރަސްމިއްޔާތުގައި ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ރިޓަޔަރޑް ވައިސް އެޑްމިރަލް ވަސީމް އަކްރަމް ވަނީ ބައިވެވަޑައިގަންނަވާފައެވެ. މީގެ އިތުރުން މާލޭގައި ދިރިއުޅޭ ޕާކިސްތާނުގެ ރައްޔިތުންވެސް މި ރަސްމިއްޔާތުގައި ބައިވެރިވެފައިވެއެވެ.
މި ރަސްމިއްޔާތުގައި އެ ޤައުމުގެ ރައްޔިތުންނާ މުޚާތަބުކޮށް ދެއްކެވި ވާހަކައިގައި ސަފީރު ވަނީ ރާއްޖޭގައި ދިރިއުޅޭ ޕާކިސްތާން ރައްޔިތުން ގުޅިގެން ޤައުމަށްޓަކައި ޚިދުމަތް ކުރުމަށް ގޮވާލާފައެވެ. ސަފީރު ވިދާޅުވީ ރާއްޖޭގައި ދިރިއުޅޭ ޕާކިސްތާން ރައްޔިތުންނަށް ދިމާވާ ކަންކަން ހައްލުކުރުމަށް މަސައްކަތް ކުރައްވާނެ ކަމަށާއި އެމްބަސީގެ ދޮރުތައް އަބަދުވެސް ޕާކިސްތާނުގެ ރައްޔިތުންނަށް ހުޅުވިފައި ހުންނާނެކަން ފާހަގަކުރައްވާފައެވެ.
"ސަފީރުކަމަށް އަހަރުމެން 3 އަހަރަށް އައެއް ކަމުގައި ވީނަމަވެސް އަސްލު ސަފީރުންނަކީ ރާއްޖޭގައި ދިރިއުޅޭ ޕާކިސްތާނުގެ ރައްޔިތުން. ރާއްޖެއަކީ އިސްލާމީ ގައުމަކަށް ވުމުން އިސްލާމީ ވެރިކަމެއް އޮތުމަކީ އުފާކުރާކަމެއް. އިސްލާމްދީނަށް ނުރައްކާތެރިވާކަމެއް އަތުވެއްޖެނަމަ އެކަން ހައްލުކުރުމަށް ޕާކިސްތާނުން އެހީތެރިވާން ތައްޔާރަށް އޮންނާން،" ވަސީމް އަކްރަމް ވިދާޅުވިއެވެ.
1956ގައި ޕާކިސްތާންގެ ނަން ވަނީ އިސްލާމިކް ރިޕަބްލިކް އޮފް ޕާކިސްތާން އަށް ބަދަލުކޮށްފައެވެ. އެއަހަރުން ފެށިގެން ކޮންމެ އަހަރެއްގެ މާރޗް މަހުގެ 23 ވަނަ ދުވަސް ފާހަގަކުރަމުން އަންނަނީ އިސްލާމިކް ރިޕަބްލިކް އޮފް ޕާކިސްތާން ނުވަތަ ޕާކިސްތާން ދުވަހުގެ ގޮތުގައެވެ.