މާލޭގައި ދުއްވާފައިދިޔަ 2 ސައިކަލް ޖެހި ހިނގި އެކްސިޑެންޓެއްގައި ޒުވާނަކަށް ބޮޑެތި އަނިޔާތަކެއް ވެއްޖެއެވެ.
ފުލުހުން ވިދާޅުވީ ރޭ މެންދަމު 2:20 ހާއިރު އަމީނީމަގާއި ސިއްތިމާވާ ހިނގުން ގުޅުން ކަންމަތިން ބާރު ސްޕީޑެއްގައި ދުއްވާފައި ދިޔަ ދެ ސައިކަލް ޖެހި ހިނގި މި އެކްސިޑެންޓްގައި އަނިޔާވެފައިވަނީ އުމުރުން 19 އަހަރުގެ ފިރިހެނަކަށް ކަމަށެވެ. މި އެކްސިޑެންޓުގައި އޭނާގެ ކޮނޑު ހުޅާއި ކޮލުގެ ކަށިގަނޑެއް ބިންދައިގެންގޮސްފައިވާކަމަށް ފުލުހުން މަޢުލޫމާތުދެއްވައެވެ. އަދި މީގެ އިތުރުން އޭނާގެ މޫނު މަށައިގެންގޮސް އެކި ވަރުގެ އަނިޔާތައްވެސް ލިބިފައިވާކަމަށް ފުލުހުން ވިދާޅުވެއެވެ.
މި މީހާއަށް މިހާރު އައިޖީއެމްއެޗްގައި ފަރުވާދެމުންގެންދާކަމަށްވެސް ފުލުހުން ވިދާޅުވެއެވެ. ފުލުހުން ވިދާޅުވީ މި އެކްސިޑެންޓްވި އަނެއްސައިކަލް ދުއްވަން އިންމީހާ ފިލާފައިވާކަމަށާއި އެމީހާ ހޯދުމުގެ މަސައްކަތް ކުރަމުންދާކަމަށެވެ.