މިފްކޯގެ ދެ މިލިއަނަށްވުރެ ގިނަ ރުފިޔާ ފޭރިގެން މައްސަލައިގައި ދެ މީހަކު ހައްޔަރުކޮށްފިއެވެ.
މި މައްސަލައިގައި ކޯޓު އަމުރެއްގެ ދަށުން ފުލުހުން ހައްޔަރުކޮށްފައިވަނީ އުމުރުން 19 އަހަރުގެ ފިރިހެނަކާއި 23 އަހަރުގެ ފިރިހެނެކެވެ. ފުލުހުން ވިދާޅުވީ އިއްޔެގެ ވަގުތެއްގެ 19 އަހަރުގެ މީހާ ހައްޔަރުކޮށްފައިވާކަމަށާއި އެ މީހާގެ ބަންދަށް 15 ދުވަސް ކްރިމިނަލް ކޯޓުން ޖަހާފައިވާކަމަށެވެ. އަދި 23 އަހަރުގެ މީހާ ރޭގެ ވަގުތެއްގައި ހައްޔަރުކޮށްފައިވާކަމަށް ފުލުހުން ވިދާޅުވެއެވެ.
މިފްކޯގެ ދެ މިލިއަނަށްވުރެ ގިނަ ރުފިޔާ ފޭރިގަނެފައިވަނީ މިމަހުގެ 20 ވަނަދުވަހު ބޮޑުތަކުރުފާނުމަގު ވިލާ ކޮލެޖް ކައިރިންނެވެ. ފައިސާ ފޭރިގަނެފައިވަނީ ސައިކަލެއްގައި މޫނު ނިވާކޮށްގެން ދިޔަ ހަތަރުމީހުންގެ ގްރޫޕަކުންނެވެ.
ފޭރިގަތް ދެ މިލިއަނަށްވުރެ ގިނަ ރުފިޔާއަކީ ފެލިވަރަށް މަސްވެރިންނަށް ބެހުމަށް ގެންދިޔަ ފައިސާ ކަމަށް މިފްކޯއިން ބުނެއެވެ. އަދި އެފައިސާ ހިފައިގެން ދިޔައީ މިފްކޯގެ ވޭނުގައި ކަމަށާއި، ފައިސާ ފޭރިގަނެފައިވަނީ ސައިކަލެއްގައި އައި ބަޔަކު ވޭނުގެ ބިއްލޫރިގަނޑު ތަޅާލުމަށްފަހުކަމަށް މިފްކޯއިން ވަނީ ބުނެފައެވެ.