ފުރަތަމަ ޑިގްރީއަށް ކިޔަވާދޭ ކޮލެޖްތަކާ ގުޅިގެން އެތަންތަނުގައި ކިޔަވަމުންދާ ދަރިވަރުންނަށް "ހިލޭ ޑިގްރީ"އަށް ކިޔަވަން ހުށަހެޅުމަށްޓަކައި ފުރަންޖެހޭ ފޯމް ފުރިހަމަކުރާނެ ގޮތުގެ މަޢުލޫމާތު ދިނުމުގެ ސެޝަންތަކެއް ކުރިއަށް ގެންދިޔުމަށް ނިންމަވާފައިވާކަމަށް ހަޔަރ އެޑިއުކޭޝަން މިނިސްޓްރީން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުން ހަޔަރ އެޑިއުކޭޝަން މިނިސްޓަރ ޑރ.އިބްރާހީމް ޙަސަން ވިދާޅުވީ ދަރިވަރުންނަށް އަމާޒުކޮށްގެން ފުރަތަމަ ޑިގްރީއަށް ކިޔެވުމަށް ހުށަހަޅާއިރު، ފުރިހަމަކުރަންޖެހޭ ކަންކަމާބެހޭ މަޢުލޫމާތު، އެންމެފުރަތަމަ ދިނުމަށް ހަމަޖެހިފައިވަނީ މާލޭގައި ހުރި ކޮލެޖްތަކަށްކަމަށެވެ.
ފުރަތަމަ ޑިގްރީއަށް ހިލޭ ކިޔެވުމުގެ ފުރުޞަތު ހުޅުވާލުމާއެކު ގިނަބައެއްގެ ތަރުޙީބެއް ލިބެމުންދާކަން ފާހަގަކުރައްވަމުން މިނިސްޓަރ ވިދާޅުވީ މި ޕްރޮގްރާމަށް ތަރުޙީބު ލިބުނުނަމަވެސް ގިނަ ފަރާތްތަކުން ހުށައަޅާފައިވާ ފޯމްތައް ފުރިހަމަ ނުވާކަމަށެވެ.
އެހެންކަމުން ފޯމްތައް ޕްރޮސެސްކުރުމަށް ދަތިތަކާ ކުރިމަތިލާންޖެހޭކަމަށާ ދަރިވަރުން މިކަމަށް ހޭލުންތެރިކުރުވުމަކީ މުހިއްމުކަމެއްކަމަށް މިނިސްޓަރ ފާހަގަކުރެއްވިއެވެ. އަދި ފޯމްގައި ހުރި މުހިއްމު މަޢުލޫމާތުތައް ފުރިހަމަ ނުވާނަމަ ދަރިވަރުގެ ކިޔެވުމަށް ބޭނުންވާ ފައިސާ ނުލިބޭނެކަމަށްވެސް މިނިސްޓަރ ވިދާޅުވިއެވެ.
"މިނިސްޓްރީގެ ބޭފުޅުން ގޮސް ދަރިވަރުންނަށް އެޕްލިކޭޝަން ފޯމް ފުރުހަމަކުރާއިރު ކުރަންވީ ގޮތުގެ މައުލޫމާތު ދެމުންދާނެ. އެޕްލިކޭޝަން ފޯމްއާއެކު ހުށައަޅަންޖެހޭ ހުރިހާ ލިޔެކިޔުންތައް ހުށައަޅައި ގެން ދަރިވަރުންނަށް ކޯހުގެ ފީ ދެއްކުމަށް ބޭނުންވާ ފައިސާ ލިބޭނީ. ފުރިހަމަ ނުވެ ހުންނަ ފޯމްތައް ބަލައިނުގަންނާނެ." ޑރ.އިބްރާހިމް ޙަސަން ވިދާޅުވިއެވެ.
ހިލޭ ޑިގްރީއަށް ކިޔަވައިދޭ އުސޫލުގެދަށުން އެމްއެންޔޫއާއި އައިޔޫއެމްގެ ޑިގްރީ ކޯސްތައް މުޅިން ހިލޭ ކިޔެވޭނެ ފުރުސަތު އޮތްއިރު އަމިއްލަ ކޮލެޖުތަކުގެ ޑިގްރީ ޕްރޮގްރާމްތަކުގައި ކިޔަވާ ދަރިވަރުންގެ ޓިއުޝަންފީ ސަރުކާރުން ދައްކައިދޭގޮތަށް ވަނީ ހަމަޖެހިފައެވެ. އެޑިއުކޭޝަން މިނިސްޓްރީން ވިދާޅުވީ ހިލޭ ޑިގްރީގެ ޕްރޮގްރާމަށް ސަރުކާރުގެ ޔުނިވަރސިޓީތަކުގެ އިތުރުން އަމިއްލަކޮލެޖުތަކުގެ އެއްބާރުލުންވެސް ލިބޭކަމަށެެވެ.
ފުރަތަމަ ޑިގްރީއަށް ހިލޭ ކިޔަވައިދިނުމުގެ ސިޔާސަތު ތަންފީޒުކުރުމަށްޓަކާ މިއަހަރަށް އެކަނިވެސް 156 މިލިއަން ރުފިޔާ ޚަރަދުވާނެކަމަށާއި، އޭގެ ތެރެއިން ބޮޑުބައެއް ޚަރަދުކުރެވިގެންދާނީ އަމިއްލަ ކޮލެޖްތަކުގެ ޓިއުޝަން ފީތަކަށްކަމަށް ހަޔަރ އެޑިއުކޭޝަން މިނިސްޓަރ ވަނީ ވިދާޅުވެފައެވެ.