އެގްޒިމް ބޭންކުގެ އެހީގައި މިއަހަރު އިތުރު 35 ރަށެއްގައި ފެނާއި ނަރުދަމާގެ ޚިދުމަތް ޤާއިމް ކުރަނީ

އިންޑިއާގެ އެގްޒިމް ބޭންކްގެ އެހީގައި އިތުރު 35 ރަށެއްގައި މިއަހަރު ފެނާއި ނަރުދަމާ ޤާއިމް ކުރުމަށް ހަމަޖެހިފައިވާކަމަށް ފިނޭންސް މިނިސްޓްރީން ވިދާޅުވެއްޖެއެވެ.

މި މަޝްރޫއުތައް ކުރިއަށް ގެންދިއުމަށް ހަމަޖެހިފައިވަނީ އިންޑިއާގެ އެގްޒިމް ބޭންކާއެކު ދާދިފަހުން ސޮއިކޮށްފައިވާ ކްރެޑިޓް ލައިން އެއްބަސްވުމުގެ ދަށުންނެވެ.

މި އެއްބަސްވުމުގެ ދަށުން ފެނާއި ނަރުދާމާގެ މަޝްރޫއުތައް ކުރިއަށް ގެންދިޔުމަށް ހަމަޖެހިފައިވަނީ 16 ރަށެއްގައެވެ. އަދި ފެނުގެ މަޝްރޫއު 16 ރަށެއްގައި ކުރިއަށް ގެންދިޔުމަށް ހަމަޖެހިފައިވާއިރު 3 ރަށެއްގައި ނަރުދަމާގެ މަސައްކަތް ކުރުމަށް ވަނީ ހަމަޖެހިފައެވެ.

މިގޮތުން ފެނާއި ނަރުދާމާގެ މަޝްރޫއުތައް ކުރިއަށްގެންދިޔުމަށް ހަމަޖެހިފައިވަނީ ހއ. ގެ ދެ ރަށަކާއި، ހދ.އާއި ނ އަތޮޅު ގެ ރަށަކާއި ރ، ކ، އއ، އދ، ވ، މ މިއިން ކޮންމެ އަތޮޅަކުން 1 ރަށެއްގަވެ. އަދި ފ.އަތޮޅުން ދެރަށެއްގައި މި މަޝްރޫއު ކުރިއަށް ގެންދިޔުމަށްހަމަޖެހިފައިވާއިރު ދ، ތ، ލ، އަދި ގދ އަތޮޅުންވެސް އެއް ރަށުގައި މި މަޝްރޫއު ކުރިއަށް ގެންދިޔުމަށް ވަނީ ހަމަޖެހިފައެވެ.

މި އެއްބަސްވުމުގެ ދަށުން ހަމަ އެކަނި ފެނުގެ މަޝްރޫއު ކުރިއަށް ގެންދިޔުމަށް ހަމަޖެހިފައިވަނީ ހއ، ހދ، ށ، ނ، ބ، ޅ، ކ މި 7 އަތޮޅުގެ ހަތް ރަށެއްގައެވެ. މީގެ އިތުރުން ވ.އަތޮޅާއި ގއ. އާއި ގދ. މި ތިން އަތޮޅުގެ ތެރެއިން ކޮންމެ އަތޮޅެއްގެވެސް ދެ ރަށެއްގައި މި މަޝްރޫއު ކުރިއަށް ގެންދިޔުމަށް ވަނީ ހަމަޖެހިފައެވެ. އަދި މ، ދ، ލ މި 3 އަތޮޅުގެ ތިން ރަށެއްގައިވެސް މި މަޝްރޫއު ކުރިއަށް ގެންދިޔުމަށް ވަނީ ނިންމާފައެވެ.

މި މަޝްރޫޢުގެ ދަށުން ހަމަ އެކަނި ނަރުދަމާގެ މަސައްކަތް ކުރިއަށް ގެންދިޔުމަށް ނިންމާފައިވަނީ ށ.އަތޮޅުގެ ރަށަކާއި އއ.އަތޮޅުގެ ދެރަށެއްގައެވެ.

ދިވެހި ސަރުކާރާއި އިންޑިއާގެ އެގްޒިމް ބެންކާއި ދެމެދު 800 މިލިއަން ޑޮލަރުގެ ކްރެޑިޓް ލައިން އެއްބަސްވުމެއްގައި ސޮއިކޮށްފައިވަނީ މިމަހުގެ 18 ވަނަ ދުވަހުއެވެ. މި އެއްބަސްވުމުގެ ދަށުން އިތުރު ރަށްތަކެއްގައި ފެނާއި ނަރުދަމާގެ މަޝްރޫޢުތައް ހިންގުމަށް ހަމަޖެހިފައިވާކަން މީގެ ކުރިންވެސް ސަރުކާރުން ވަނީ ހާމަކުރައްވާފައެވެ.