ޓީބީ ބައްޔާމެދު ޢާއްމުން ހޭލުންތެރިކުރުވުމަށާއި އެބައްޔާ ދެކޮޅަށް މަސައްކަތްކުރުމަށް ބާރު އެޅުމުގެގޮތުން ޚާއްސަ ދުވުމެއް ބާއްވާއިފިއެވެ.
ހެލްތް ޕްރޮޓެކްޝަން އެޖެންސީން އިސްނަގައިގެން ކުރިއަށްގެންދިޔަ މި ދުވުމުގައި ސަރުކާރުގެ އެކި މުވައްސަސާތަކާއި އަމިއްލަ ކުންފުނިތަކުގައި މަސައްކަތްކުރާ މުވައްޒަފުންނާއި ބައެއް ޢާއްމުންވެސް ބައިވެރިވިއެވެ.
މި ދުވުމުގައި ބައިވެރިވި މީހުން ވަނީ މާފަންނު ސޯޝަލް ސެންޓަރ ހިމެނެ ސަރަޙައްދު ވަށައި ދެ ބުރު ޖަހާފައެވެ.
މި ދުވުމާ ގުޅޭގޮތުން މަޢުލޫމާތު ދެއްވަމުން އެޗްޕީއޭގެ ޕަބްލިކް ހެލްތްގެ ޑިރެކްޓަރ ޖެނަރަލް މައިމޫނާ އަބޫބަކުރު ވިދާޅުވީ މިދުވުމަކީ ޓީބީއާ ދެކޮޅަށް އެންމެންގުޅިގެން މަސައްކަތް ކުރުމަށާއި، މިމަސައްކަތަށް އެންމެންގެ އެއްބާރުލުން ހޯދުމުގެ ގޮތުން ކުރިއަށް ގެންދިޔަ ދުވުމެއްކަމަށެވެ. 2022ވަނަ އަހަރު އައުމުގެ ކުރިން ރާއްޖެއަކީ ޓީބީ މުޅިން ނައްތާލާފައިވާ ޤައުމަކަށް ހެދުމަށްޓަކައި ކުރާ މަސައްކަތް ކާމިޔާބުކުރުމަށް ގިނަ މަސައްކަތްތަކެއް ކުރަންޖެހޭކަމަށް މައިމޫނާ ވިދާޅުވިއެވެ. މިއަމާޒަށް ވާޞިލްވުމަށްޓަކައި ކުރަންޖެހޭ މަސައްކަތްތައް ހެލްތު މިނިސްޓްރީން ފަށާފައިވާކަމަށް އޭނާ ވިދާޅުވިއެވެ.
" ޓީބީ ގެ ފަރުވާ ފުރިހަމަކުރުމުން ޓީބީ ބަލި ފަސޭހަވެގެންދާނެ. މި ބައްޔަކީ ބިރުގަންނަފަދަ ބައްޔަކަށް ނުހެދުމަށް.ޓީބީ ބައްޔާ ދެކޮޅަށް އެންމެ އެކުގައި މަސައްކަތްކުރަންޖެހޭ." މައިމޫނާ އަބޫބަކުރު ވިދާޅުވިއެވެ.
"ޓިއުބަރކިއުލޯސިސް: ނުވަތަ ޓީބީ ބައްޔަކީ މައިކްރޯބެކްޓީރިއަމް ޓިއުބަރކިއޮލޯސިސް ކިޔާ ޖަރާސީމަކުން، ފުއްޕާމެޔާއި، ހަށިގަނޑުގެ އެހެނިހެން ގުނަވަންތަކަށް ޖެހޭ ބައްޔަކެވެ. މި ބަލީގެ ސަބަބުން ކެއްސާއިރު ލޭއައުމާއި، މޭގައި ރިއްސުމާއި، ވަރުބަލިވުންފަދަ ކަންކަން ކުރިމަތިވެއެވެ.
ކޮންމެ އަހަރެއްގެ މަރޗް މަހުގެ 24ވަނަ ދުވަސް ދުނިޔޭގެ ޓީބީ ދުވަހުގެ ގޮތުގައި ފާހަގަކުރަމުން އަންނައިރު، މިދުވަހުގެ މިއަހަރުގެ ޝިއާރެއްގެ ގޮތުގައި ކަނޑައަޅާފައިވަނީ "ޓީބީ ނައްތާލުމަށް އިސްނަގައިގެން ކުރެވެން ހުރި ކަންތައްތައް ކުރުމުގެ ވަގުތު ޖެހިއްޖެ." މިޝިއާރެވެ.