ކަޅުވަކަރު މިސްކިތް އަލުން ބެހެއްޓުމުގެ މަސައްކަތް ކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން އިޢުލާންކޮށްފިއެވެ.
ކަޅުވަކަރު މިސްކިތް ބެހެއްޓުމުގެ މަސައްކަތް ކޮށްދޭނެ ފަރާތެއް ހޯދަން އިޢުލާންކޮށްފައިވާއިރު ކަޅުވަކަރު މިސްކިތް އަލުން ބެހެއްޓުމަށް ހަމަޖައްސައިފައި ވަނީ އިސްލާމީ މަރުކަޒު ކައިރީގައި ކުރިން ދިރާގު ހެޑް އޮފީސް ހުރި ހުސް ބިމުގައެވެ. މިމަސައްކަތް ކޮށްދޭނެ ފަރާތެއް ހޯދާނީ ނޭޝަނަލް ކޮމްޕެޓިޓިވް ބިޑިންގ، އެން.ސީ.ބީގެ އުޞޫލުގެ މަތިންކަމަށް ފިނޭންސް މިނިސްޓްރީން ބުނެއެވެ. އެގޮތުން މި ޕްރޮޖެކްޓްގެ ބިޑް ސެކިއުރިޓީއެއްގެ ގޮތުގައި 15000 ރުފިޔާ ދައްކަންޖެހޭއިރު ބީލަމުގައި ބައިވެރިވުމަށް 500 ދިވެހި ރުފިޔާގެ ރަޖިސްޓްރޭޝަން ފީއެއް ދައްކަންޖެހެއެވެ.
ފިނޭންސް މިނިސްޓްރީގެ އިޢުލާނުގައި މަސައްކަތާބެހޭ އެންމެހާ މަޢުލޫމާތު ފިނޭންސް މިނިސްޓްރީގެ ވެބްސައިޓުން ލިބެން ހުންނާނެކަމަށް ބުނެފައިވެއެވެ. އަދި ބީލަން ހުޅުވުން އޮންނާނީ 8 މޭގެ ހެނދުނު 11 ޖަހާއިރުކަމަށް ފިނޭންސް މިނިސްޓްރީން ބުނެއެވެ.
ކަޅުވަކަރު މިސްކިތް އަލުން ބަހެއްޓުމުގެ މަސައްކަތްކޮށް ދޭނެ ފަރާތެއް ހޯދުމަށް ފިނޭންސް މިނިސްޓްރީން އިޢުލާންކޮށްފައިވާއިރު މީގެ ކުރިން ހެރިޓޭޖް މިނިސްޓްރީންވެސް ވަނީ އެ މިސްކިތުގެ ބައިތަކަށް ފަރުވާދިނުމުގެ މަސައްކަތް ބަޔަކާ ޚަވާލުކޮށްގެން ކުރިއަށްގެންގޮސްފައެވެ. މީގެ އިތުރުން ކަޅުވަކަރު މިސްކިތް އަލުން ރަވާއި ބަހައްޓަން ކަނޑައަޅާފައިވާ ސަރަޙައްދުގެ ކުރެހުންތައްވެސް މިހާރު ވަނީ ނިންމާލާފައެވެ.
ސަރުކާރުގެ ފުރަތަމަ ސަތޭކަ ދުވަހު ކުރަން ނިންމާފައިވާ ކަންކަމުގެ ތެރޭގައި ހިމެނޭ ކަޅުވަކަރު މިސްކިތް އަލުން ރަވާއި ބެހެއްޓުމުގެ މަސައްކަތުގެ ތެރެއިން މިސްކިތް ބަހައްޓާ ސަރަހައްދާއި ސަލްޓަން ޕާކު ގުޅިގެންދާނެ ގޮތަށް މަސައްކަތްތަކެއް ކުރުމަށްވެސް ވަނީ ހަމަޖެހިފައެވެ.
ކަޅުވަކަރު މިސްކިތުގެ ހިރިގަލުގެ ހުރިހާ ބައިތައް މަރާމާތުކޮށް އާބާތުރަ ފިލުވުމުގެ މަސައްކަތްވެސް މިހާރު ވަނީ ނިމިފައެވެ.
މާލޭގައި ހުރި ކަޅުވަކަރު މިސްކިތް ރޫޅާލިއިރު އެމިސްކިތުގެ ބައިތަކުގެ ތެރެއިން ލިޔެލާޖަހާފައިވާ ބައިތައް ނެތްއިރު އެބައިތައް މިހާރު ވަނީ އަލުން ލިޔެލާ ޖަހައިގެން ހަދާފައެވެ. މިހުރިހާ މަސައްކަތްތަކެއް މިހާރު ނިންމާލާފައިވާއިރު ދާދިފަހުން ވަނީ އެ މިސްކިތުގެ މަތިވަޑާމަށް ބޭނުންވާ ލަކުޑިތައްވެސް ރާއްޖެ ގެނެސްފައެވެ.
ކަޅުވަކަރު މިސްކިތް އަލުން ސަލްޓަން ޕާކު ސަރަޙައްދުގައި ބަހައްޓަން ނިންމާފައިވަނީ އިހުގެ އާސާރީ މިސްކިތެއްގެ ހައިބަތު ފެންނާނެހެން، މީހުންނަށް ނަމާދުކުރެވޭނެ އިންތިޒާމުތަކާވެސްއެކުއެވެ.
ކަޅުވަކަރު މިސްކިތަކީ ތަފާތު ކުރެހުން އަޅައިފައި ހުރި، ފާރުތައް ހިރިގަލުން ހަދައި، ބިންވަޅު ނަގައިފައި ހުރި މިސްކިތެކެވެ.
މި މިސްކިތުގައިވާ ހިރިގަލުތަކުގައިވާ ލިޔުންތަކުން އެނގޭ ގޮތުގައި މިސްކިތް ބިނާ ކުރެވުނީ އައްސުލްޠާން ޙަސަން ނޫރައްދީން އިސްކަންދަރު ކައްތިރި ބަވަނަ މާހަރަދުންގެ ރަސްކަމުގެ 10 ވަނަ އަހަރުގައެވެ. މި ރަދުން ރަސްކަން ކުރެއްވީ މީލާދީން 1179 ވަނަ އަހަރުން ފެށިގެން 1799 ވަނަ އަހަރާ ހަމައަށެވެ. އެހެންކަމުން މި މިސްކިތަކީ 200 އަހަރަށްވުރެ ގިނަދުވަސްވެފައިވާ ދިވެހިންގެ ތަރިކައެކެވެ.