ދުނިޔޭގެ ޞިއްޙަތު ޖަމްޢިޔާއިން ކޮންމެ އަހަރަކު ބާއްވަމުންއަންނަ "ވާރލްޑް ހެލްތު އެސެމްބްލީ"ގެ 72 ވަނަ ބައްދަލުވުމުގައި ރާއްޖެއިން ބައިވެރިވެއްޖެއެވެ.
މި އެސެމްބްލީގައި ރާއްޖެ ތަމްޞީލްކުރާ ވަފްދުގައި އިސްކޮށް ބައިވެރިވެވަޑައިގަންނަވަނީ މިނިސްޓަރ އޮފް ހެލްތް އަބްދުﷲ އަމީންއެވެ. މިއަހަރުގެ ހެލްތު އެސެމްބްލީގެ ކޮމިޓީ ބީގެ ވައިސް ޗެއަރމަންކަން މިނިސްޓަރ އޮފް ހެލްތު ޢަބްދުﷲ އަމީން އަދާކުރައްވާނެއެވެ.
"ވާރލްޑް ހެލްތު އެސެމްބްލީ"ގެ 72 ވަނަ ބައްދަލުވުން މިއަހަރު ކުރިއަށްގެންދަނީ ސްވިޒްލޭންޑްގެ ޖެނީވާގައެވެ. މިއަހަރުގެ ހެލްތު އެސެމްބްލީގައި ދުނިޔޭގެ ޞިއްޙަތު ޖަމްޢިއްޔާގެ 194 މެންބަރު ޤައުމުން ވަނީ ބައިވެރިވެފައެވެ.
މިމަހުގެ 20 ން 28 އަށް ކުރިއަށްދާ މި ބައްދަލުވުމަކީ ދުނިޔޭގެ ސިއްޙީ ދާއިރާގެ އެންމެ މަތީ ވެރިންނާއި އަދި އެދާއިރާގެ އެންމެ ކުރީ ސަފުގައި މަސައްކަތްކުރައްވާ ފަރާތްތަކުގެ މެދުގައި ބޭއްވޭ ސިއްޙަތާއި ބެހޭ އެންމެ މުހިންމު ބައްދަލުވުމެވެ.
މިބައްދަލުވުމުގައި މިނިސްޓަރ އޮފް ހެލްތު އަބްދުﷲ އަމީން ތަޤުރީރު ކުރެއްވުމަށްވެސް ހަމަޖެހިފައިވާކަމަށް ހެލްތް މިނިސްޓްރީން މަޢުލޫމާތުދެއްވައެވެ.
މިއަހަރުގެ ހެލްތް އެސެމްބްލީގައި ޤައުމުތަކުގެ ވަފުދުގެ އިސްބޭފުޅުން ތަޤްރީރު ކުރެއްވުމަށް ހަމަޖެހިފައިވާ މައުޟޫއަކީ: "ޔުނިވަރސަލް ހެލްތް ކަވަރރޭޖް: ލީވިން ނޯ ވަން ބިހައިންޑް" އެވެ.
މި އެސެމްބްލީގައި ރާއްޖެއިން ކޯ-ސްޕޮންސަރ ކޮށްގެން 2 ސައިޑް އިވެންޓެއް ބޭއްވުމަށް ހަމަޖެހިފައިވެއެވެ. މިސައިޑް އިވެންޓްތަކުގައި މަޝްވަރާ ކުރުމަށް ހަމަޖެހިފައިވަނީ ސާޖަރީގެ ޚިދުމަތްތައް ރައްކާތެރިގޮތުގައި ފޯރުކޮށްދިނުމާ ބެހޭގޮތުންނާއި ތިމާވެއްޓަށް އަންނަ ނޭދެވޭ ބަދަލުތަކާއި ގުޅިގެން ސިއްޚަތަށް ކުރާ އަސްރުތަކާ ގުޅޭގޮތުންނެވެ. މިދެއިވެންޓްގައިވެސް ދިވެހިރާއްޖޭގެ ފަރާތުން ބައިވެރިވެ ވާހަކަދެއްކުމަށް ވަނީ ހަމަޖެހިފައެވެ.
މީގެ އިތުރުން ދޭދޭ ޤައުމުތަކުގެ މެދުގައި ގުޅުން ބަދަހިކުރުމަށާއި ރާއްޖޭގެ ޞިއްޙީ ދާއިރާ ކުރިއެރުވުމަށް ޤައުމުތަކާއި އެހީދޭ ޖަމްޢިއްޔާތަކުގެ އެހީތެރިކަން ހޯދިދާނެ ދާއިރާތަކާއިގުޅޭގޮތުން މަޝްވަރާކުރުމަށް ތަފާތު ބައްދަލުވުންތައްވެސް ބޭއްވުމަށް ހަމަޖެހިފައެވެ.
މީގެ އިތުރުންވެސް ދުނިޔޭގެ ޞިއްޙަތު ޖަމިއްޔާގެ ދެކުނު އިރުމަތީ އޭޝިޔާގެ ރީޖަނަލް ޑިރެކްޓަރ އާއި ސްޓޮޕް ޓީބީ، ގްލޯބަލް ފަންޑް، އިންޓަނޭޝަނަލް އޯގަނައިޒޭޝަން ފޯރ މައިގްރަންޓްސް ފަދަ ޞިއްޙަތާއި ގުޅުންހުރި ޖަމްޢިއްޔާތަކާއެކުވެސް ބައްދަލުވުންތައް ބޭއްވުމަށްވެސް ހަމަޖެހިފައެވެ.
މިދިޔަ އަހަރެކޭވެސް އެއްފަދައިން މިއަހަރުގެ އެސެމްބްލީއާއި ގުޅުވައިގެންވެސް "ވޯކް ދަ ޓޯކް"ގެ ނަމުގައި ދުޅަހެޔޮ ޞިއްޙަތެއްގައި ހުރުމާއި ހެލިފެލިވެއުޅުމަށް ބާރުއެޅުމުގެ މަޤްޞަދުގައި ހިނގާލުމަކާއިއެކު ހަރަކާތްތަކެއް ބާއްވާފައިވެއެވެ. އާދީއްތަ ދުވަހު ބޭއްވި މިހަރަކާތުގައި ދިވެހިރާއްޖޭގެ ވަފްދުންވެސް ވަނީ ބައިވެރިވެފައެވެ.
މިއަހަރުގެ މިބައްދަލުވުމުގައި ހެލްތް މިނިސްޓަރގެ އިތުރުން ޖެނީވާގައި ހުންނަ ދިވެހިރާއްޖޭގެ މިޝަންގެ ޕަރމަނަންޓް ރެޕްރެޒެންޓެޓިވް ޑރ. ހާލާ ހަމީދާއި މިނިސްޓްރީ އޮފް ހެލްތުގެ އިސްބޭފުޅުންނާއި، ޖެނީވާ މިޝަންގެ އިސް މުވައްޒަފުން ވަނީ މިބައްދަލުވުމުގައި ބައިވެރިވެފައިވެއެވެ.