ބަޙްރެއިންގެ ޤައުމީ އެއަރލައިން، ގަލްފް އެއަރގެ ދަތުރުތައް ދިވެހިރާއްޖެއަށް ފެށުމަށް ތައްޔާރުވެއްޖެއެވެ.
އެއަރލައިނުންވަނީ ރާއްޖެއަށް ދަތުރުތައް ފެށުމަށް އެ އެއަރލައިންގެ ފްލީޓަށް އިތުރު މަތިންދާބޯޓެއް ގެނެސްފައެވެ. އެއަރބަސް އޭތްރީޓުވެންޓީ ނިއޯ މަރުކައިގެ މި މަތިންދާބޯޓު ބޭނުންކުރާނީ ރާއްޖެއަށް ދަތުރުތައް ކުރުމަށްކަމަށް ގަލްފް އެއަރއިން ބުނެއެވެ.
ގަލްފް އެއަރއިން ރާއްޖެއަށް ދަތުރުތައް ފެށުމަށް ހަމަޖެހިފައިވަނީ އޮކްޓޫބަރ 26ގައެވެ. އެގޮތުން، އެއަރލައިނުން ރާއްޖެއަށް ހަފުތާއަކު ފަސް ދަތުރުކުރާނެއެވެ. މި ދަތުރުތައް ކުރުމަށް ހަމަޖެހިފައިވަނީ ބަޙްރެއިން އިންޓަރނޭޝަލް އެއަރޕޯޓުން ސްރީލަންކާގެ ކޮލޮމްބޯގައި ޓްރާންސިޓްކުރުމަށްފަހު، ވެލާނާ އިންޓަނޭޝަލް އެއަރޕޯޓަށެވެ.
ގަލްފް އެއަރގެ ދަތުުރުތައް ދުނިޔޭގެ އެކި ހިސާބުތަކަށް ފުޅާކުރުމަށް އެއަރބަސް އޭތްރީޓުވެންޓީ ނިއޯ މަރުކައިގެ 12 މަތިންދާބޯޓު 2023ވަނަ އަހަރުގެ ނިޔަލަށް އެ އަރލައިންގެ ފްލީޓަށް އިތުރުކުރުމަށް ދަނީ މަސައްކަތްކުރަމުންނެވެ.