އިންޑިއާގައި ރާއްޖެ އިތުރަށް އިޝްތިހާރުކުރުމަށްޓަކައި ޓީޓީއެމްގެ ފަރާތުން އެޤައުމުގައި ޓްރޭޑް ޝޯވްއެއް ބޭއްވުމަށް ނިންމައިފިއެވެ.
ޓީޓީއެމް މައިސް އެންޑް ވެޑިންގްސް 2019ގެ ނަމުގައި ބާއްވާ މި ހަރަކާތް އޮންނާނީ އަންނަ އޮކްޓޫބަރުމަހުގެ ތެރޭގައެވެ. މި ޓްރޭޑް ޝޯވް ބޮޑަށް އަމާޒްކޮށްފައިވަނީ ކައިވެނީގެ ހަފްލާގައި ބޭއްވުމަށް ޤައުމުން ބޭރަށް ދަތުރުކުރާ ފަރާތްތަކަށާއި، ވިޔަފަރި ދަތުރުތައް ކުރާ ފަރާތްތަކަށެވެ.
ވިޔަފާރީގެ ބޭނުންތަކަށް ނުވަތަ ވަޒީފާގެ އެކި ކަންކަމުގައި ޤައުމުންބޭރަށްދާ އިންޑިއާ މީހުންގެ އަދަދު ދަނީ އިރުތުވަމުންނެވެ. އެގޮތުން 2030ވަނަ އަހަރު އަންނަންވާއިރަށް އެ މަރކެޓްގެ އަގު ނުވަ ބިލިއަން ޑޮލަރަށް އަރާނެ ކަމަށް ވަނީ ލަފާކޮށްފައެވެ.
ޓީޓީއެމް މައިސް އެންޑް ވެޑިންގްސް ހަރަކާތުގައި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި އިންޑިއާގެ ޓުއަރ އޮޕަރޭޓަރުންނާއި ގުޅާލުމަށް، ބިޒްނަސް ޓު ބިޒްނަސް ބައްދަލުވުންތަށް ކުރިއަށްގެންދިޔުމަށްވަނީ ރާވާފައެވެ.
އިންޑިއާއަކީ ރާއްޖެއަށް އަންނަ ފަތުރުވެރިންގެ އަދަދު އެންމެ ބާރު ދުވެއްޔެއްގައި އިތުރުވަމުން އަންނަ އެއް ޤައުމެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާގޮތުން، ރާއްޖެއަށް ތިންވަނަ އަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ އިންޑިއާއިންނެވެ. އެގޮތުން ހުސްވި މަހުގެ ނިޔަލަށް އެޤައުމުން ރާއްޖެއަށް 66265 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ މިދިޔަ އަހަރުގެ މިމުއްދަތާއި އަޅާ ބަލާއިރު %96 އިތުރު އަދަދެކެވެ.