އައްޑޫ ސިޓީ ހިތަދޫގައި ނަރުދަމާގެ މަސައްކަތް ލަސްވަނީ މުވައްޒަފުންގެ ދަތިކަން ހުރުމުން ކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.
އައްޑޫގެ ނަރުދަމާގެ މަސައްކަތް ކުރިއަށްދާ ގޮތާބެހޭގޮތުން ސިޓީ ކައުންސިލަށް މަޢުލޫމާތު ހިއްސާކުރުމަށް ފެނަކަ އައްޑޫ ގޮފިން ވަނީ ބުރާސްފަތިދުވަހު ކައުންސިލާ ބައްދަލުކުރައްވާފައެވެ. މިބައްދަލުވުމުގައި އައްޑޫގެ ނަރުދަމާގެ ޙިދުމަތްދިނުން ލަސްވަމުންދާތީ ރައްޔިތުންގެ ޝަކުވާ އިތުރުވެފައިވާކަން ކައުންސިލުންވަނީ ފާހަގަކުރައްވާފައެވެ. އަދި މިހާރު ނަރުދަމާގެ މަސައްކަތް ރޭވިފައިވާގޮތް ކައުންސިލުން އޮޅުންފިލުވިއެވެ.
ކައުންސިލުގެ ކަންބޮޑުވުންތަކަށް ޖަވާބު ދެއްވަމުން ފެނަކައިން ވިދާޅުވެފައިވަނީ، މަސައްކަތް ތާވާލަ އެއްގޮތަށް ނިންމުމަށް މަސައްކަތް ކުރަމުންދާކަމަށެވެ. ނަމަވެސް އެފަރާތަށް ހިތަދޫގައި ދިމާވެފައިވާ އެންމެ ބޮޑު މައްސަލައަކީ މުވައްޒަފުންގެ ދަތިކަން ކަމަށް ފެނަކައިން ވިދާޅުވެއެވެ.
ފެނަކައިން ބުނި ގޮތުގައި ހިތަދޫ ދެކުނު ދައިރާގެ ގެތަކަށް ކަނެއްކްޝަން ގުޅައިދިނުމުގެ މަސައްކަތް ފެށި މިމަހުގެ 12އާ ހަމައަށް އެމަސައްކަތް ނިމިގެންދާނެކަމަށެވެ. އަދި ހިތަދޫ އުތުރު އަދި މެދު ދާއިރާއަށް ކަނެކްޝަން ގުޅުމުގެ މަސައްކަތް މިމަހުގެ މެދެއްހާ ތަނުގައި ފަށައި އަންނަ އޮކްޓޯބަރުމަހުގެ ކުރީކޮޅު ނިންމާލެވޭނެ ކަމަށް ފެނަކައިން ވިދާޅުވެއެވެ.
އައްޑޫސިޓީގެ ނަރުދަމާ މަސައްކަތުގެތެރެއިން މަރަދޫ، މަރަދޫ ފޭދޫ އަދި ފޭދޫގެ ނަރުދަމާގެ ހޮޅިތަށް އަދި މުޅިން އަޅައި ނުނިމޭކަމަށް ފެނަކަ ކޯޕަރޭޝަނާ ހަވާލާދީ އައްޑޫސިޓީ ކައުންސިލުން ވިދާޅުވެއެވެ. މިހާތަނަށް އައްޑޫގައި ނިމިފައިވަނީ ހުޅުދޫ އަދި މީދޫގެ ނަރުދަމާ ނިޒާމެވެ.