އައްޑޫގެ ކަރަންޓު މައްސަލަ މުޅިން ހައްލުކުރަން އަދި ދެދުވަސްވަރު ހޭދަވާނެކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.
އާދިއްތަ ދުވަހު ހަވީރުން ފެށިގެން އައްޑޫސިޓީގެ ގުޅިފައިވާ ރައްތަކުން ވަނީ ކަރަންޓު ކެނޑިފައެވެ. ފެނަކައިގެ ޑިސްްޓްރިބިއުޝަން ނެޓްވޯކަށް ދިމާވި މައްސަލަ ހައްލުކުރުމަށް ފެނަކައިގެ ދެއިންޖީނިއަރަކު ދަނީ ހަރަކާތްތެރި ވަމުންނެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ފެނަކަ، އައްޑޫ ގޮފިން ވިދާޅުވީ މިހާރު ދިމާވެފައިވާ މައްސަލަ ދެނެގަނެވި އެކަން ޙައްލުކުރުމަަށް މަސައްކަތް ކުރަމުންދާކަމަށާ، ބައެއް ގަޑިތަކުގައި އަދިވެސް ކަރަންޓު ހިނގައިދާނެކަމަށް ބަލައި، މަސައްކަތް ކުރަމުންދާ ވަގުތުތަކުގައި ކަރަންޓު ކެނޑިދާނެ ސަރަހައްދުތައް ދުރާލައި އެނގޭނެފަދަ ޝެޑިއުލެއް ތައްޔާރުކުރުމަށް މަސައްކަތް ކުރަމުންދާކަމަށްވެސް ފެނަކައިން ވިދާޅުވިއެވެ. އަދި މިމައްސަލަ ހައްލުކުރުމަށް ދެދުވަސް ނަގާނެކަމަށްވެސް ފެނަކައިން ވިދާޅުވެއެވެ.
ކަރަންޓުގެ މައްސަލައިގައި އައްޑުއަށް ނިސްބަތްވާ މަޖިލިސް މެންބަރުންނާއި ސިޓީ ކައުންސިލުންވެސް ވަނީ ފެނަކައަށް ވަރަށް ބޮޑަށް ފާޑުވިދާޅުވެފައެވެ. އެގޮތުން އައްޑޫ ސިޓީގެ މޭޔަރ ކުރެއްވި ޓްވީޓެއްގައި ވިދާޅުވެފައިވަނީ މިމައްސަލައަށް ދާއިމީ ހައްލެއް ހޯދައި ނުދެވުނުކަމަށެވެ.
ހިތަދޫ މެދު ދައިރާގެ މެންބަރު އަހުމަދު ރަޝީދު ވިދާޅުވީ މިމައްސަލަ ހައްލުކުރުމަށް ފެނަކައިން އެކަށީގެންވާ މަސައްކަތެއް ނުކުރާ ކަމަށެވެ.
މިކަމާއި ގުޅިގެން އައްޑޫގެ ވަރަށް ގިނަބަޔަކު ދަނީ ކަންބޮޑުވުން ފާޅުކުރަމުންނެވެ. ގިނަ ރައްޔިތުންގެ ކަންބޮޑުވުން ހުރީ އައްޑޫގައި ކަރަންޓުގެ މައްސަލަ ބޮޑުވެފައިވާއިރު، މިހާރުވެސް މިކަމަށް ވަގުތީހައްލެއް ހޯދާތީއެވެ. އަދި ކޮންމެ ފަހަރަކުވެސް ދައިމީ ޙައްލެއްނުދެވި ބޮޑެތި ގެއްލުން ވަމުންދާކަން ރައްޔިތުން ފާހަގަކުރެއެވެ.
އައްޑޫސިޓީގެ ގުޅިގަފައިވާ ރައްތަކަށް ކަރަންޓު ދެނީ ސަރަހައްދީ އިންޖީނުގެއަކުންނެވެ. އައްޑޫގެ ކަރަންޓަށް ފަހަކަށް އައިސް ވަރަށް ގިނައިން މައްސަލަތަށް ދިމާވެއެވެ.