މަޖީދީ މަގުގައި ބަހައްޓާ ފަޔަރ ހައިޑްރަންޓް ސިސްޓަމްތަކުގެ މަސައްކަތް އަވަހަށް ނިންމުމާގުޅޭގޮތުން ސަރުކާރުގެ ކަމާގުޅޭ ފަރާތްތަކާއެކު ޑިފެންސް މިނިސްޓްރީން މަޝްވަރާކުރައްވައިފިއެވެ.
މަޖީދީ މަގު އަލުންހެދުމަށް މަސައްކަތްކުރިއިރު އެމަގުގައި ފަޔަރ ހައިޑްރަންޓް ސިސްޓަމް ބެހެއްޓުމަށް ވަނީ މަސައްކަތް ކޮށްފައެވެ. މިބައްދަލުވުމުގައި މަޖީދީ މަގުގައި ފަޔަރ ހައިޑްރަންޓް ސިސްޓަމް ބެހެއްޓުމުގެ މަޝްރޫޢު އަލުން ފަށައި މިމަސައްކަތް ވީހާވެސް އަވަހަށް ނިންމުމަށް ވަނީ މަޝްވަރާ ކޮށްފައެވެ.
މި ބައްދަލުވުމުގައި މިނިސްޓްރީ އޮފް ޑިފެންސްގެ ޑެޕިއުޓީ މިނިސްޓަރ ޙަސަން ޒަމީލާއި މާލޭ ސިޓީ ކައުންސިލްގެ އިސްވެރިންނާއި އެމްއެންޑީއެފް ފަޔަރ އެންޑް ރެސްކިއު ސަރވިސްގެ ކޮމާންޑަރ ކާނަލް ޢަބްދުﷲ އިބްރާހީމް ބައިވެރިވެ ވަޑައިގެންނެވިއެވެ. އަދި ޑިފެންސް މިނިސްޓްރީއާއި އެމްއެންޑީއެފް ފަޔަރ އެންޑް ރެސްކިއު ސަރވިސްގެ އިތުރުން މާލޭ ސިޓީ ކައުންސިލާއި އެމްޑަބްލިޔު އެސްސީ އަދި ހައުސިންގ މިނިސްޓްރީގެ ޓެކްނިކަލް ބޭފުޅުން ބައިވެރިވެ ވަޑައިގެންނެވިއެވެ.
މާލޭގައި ބާރަ ހައިޑްރެންޓް ސިސްޓަމްތައް ޤާއިމް ކުރެއްވުމުގެ މަޝްރޫއެއް ފަށާފައިވަނީ 2016ވަނަ އަހަރުއެވެ. އެމަސައްކަތްކުރުމަށް ހަމަޖައްސާފައިވަނީ ޑިފެންސް މިނިސްޓްރީއާއީ، ރޯޑް ޑިވެލޮޕްމެންޓް ކޯޕަރޭޝަނާއި، އެމް.ޑަބްލިއު އެސް،ސީ ގުޅިގެން ކުރިޔަށް ގެންދާ މަޝްރޫޢެއްގެ ގޮތުގައެވެ. އެހެންނަމަވެސް މިހާތަނަށް އައިރުވެސް މި މަސައްކަތް އެއްކޮށް ނިންމޭގޮތް ވަނީ ނުވެފައެވެ.
ފަޔަރ ހައިޑްރެންޑް ސިސްޓަމަކީ އަލިފާނުގެ ހާދިސާއެއް ހިނގައިފިނަމަ އަލިފާން ނިއްވުމަށް ބޭނުންވާނެ ފެން ލިބޭނެ އަވަސް އިންތިޒާމެއް ހަމަޖެއްސެވުމަށްޓަކައި ޤާއިމުކުރާ ނިޒާމެކެވެ.