މާލެއާއި ހުޅުމާލެއާއި ވިލިމާލޭގެ ނަރުދަމާ ނިޒާމު ހިންގާ ބެލެހެއްޓުން އިތުރަށް ހަރުދަނާކުރުމަށް އެމް.ޑަބްލިޔު.އެސް.ސީ އިން ސަރވޭއެއް ކުރަން ފަށައިފިއެވެ.
މި ސަރވޭ ކުރިއަށް ގެންދިޔުމަށް ހަމަޖެހިފައިވަނީ މިއަދުން ފެށިގެން އަންނަމަހުގެ 30 ވަނަ ދުވަހަށެވެ. މާލެއާއި ހުޅުމާލެއާއި ވިލިމާލެ ހިމެނޭގޮތަށް ދެމަސްދުވަހަށް ކުރިއަށްގެންދާ މިސަރވޭގައި ކޮމާރޝަލް ބަދިގެތަކުގައި އޮއިލް ޓްރެޕް ހުރިތޯ ފާސްކުރުމާއި ވިޔަފާރީގެ ކަންކަމަށް ބޭނުންކުރާ ބަދިގެތައް ދެނެގަތުމަށް ވަނީ ހަމަޖެހިފައެވެ. އަދި ޢިމާރާތްތަކުގެ ދިޔަދޮވިތައް ގުޅާފައިވާ ގޮތްވެސް ބެލުމަށް ވަނީ ހަމަޖެހިފައެވެ.
މީގެ އިތުރުން ދޮރުން ދޮރަށް ހިނގައި، ގޭގޭގެ ނަރުދަމާ ނިޒާމަށް މައްސަލަތައް ދިމާވުމަށް މެދުވެރިވާ ސަބަބުތަކަށް ހޭލުންތެރިކުރުވުމަށް މަޢުލޫމާތު ދިނުމަށް ހަމަޖެހިފައިވާކަމަށްވެސް އެ ކުންފުނިން ބުނެއެވެ.
މިސަރވޭ ކުރިއަށްގެންދަނީ އެމް.ޑަބްލިޔު.އެސް.ސީގެ މުވައްޒަފުންކަމަށާއި މިސަރވޭގައި އެއްވެސް ފައިސާގެ މުޢާމަލާތެއް ނުކުރާނެކަމަށް އެމްޑަބްލިޔުއެސްސީން ބުނެއެވެ. މި ސަރވޭއަކީ އެ ކުންފުނިން ދެމުންގެންދާ ޚިދުމަތްތައް ފުޅާކޮށް، އިތުރަށް ތަރައްޤީކޮށް ލުއިފަސޭހަކަމާއެކު ޚިދުމަތްތައް ލިބޭނެ އިންތިޒާމްތައް ހަމަޖެއްސުމަށް ކުރިއަށްގެންދާ ސަރވޭއެކެވެ.