އައްޑޫގައި ތަޢުލީމު ފުރިހަމަ ނުކުރެވި ތިބި ޒުވާނުންނަށް އަމާޒު ކޮށްގެން ހިންގާ އަލްޓާނޭޓިވް ލާރނިންގ ޕްރޮގްރާމް ރަސްމީކޮށް އިފްތިތާޙް ކޮށްފިއެވެ.
މިޕްރޮގްރާމު އިފްތިތާޙް ކޮށްފައިވަނީ، މިކަމަށްޓަކައި އައްޑޫސިޓީ ގަމުގެ އީކުއޭޓަރ ގައި ބޭއްވި ޖަލްސާގައެވެ. ދިވެހި ރެޑްކްރެސެންޓުގެ އައްޑޫ ގޮތްޕާއި ޔުނިސެފާއި، އައްޑޫސިޓީ ކައުންސިލް ގުޅިގެން ހިންގާ މި ޕްރޮގްރާމަކީ އައްޑޫގައި، ތަޢުލީމުގެ އެކި މަރްޙަލާތަށް ފުރިހަމަ ނުކުރެވި ތިބި ކުދިންނާއި ޒުވާނުން މުޖްތަމަޢުގައި ބޭނުންތެރި ބަޔަކަށް ހެދުމުގެ މަޤްޞަދުގައި ހިންގޭ ޕްރޮގްރާމެކެވެ. އެގޮތުން ޕްރޮގްރާމް ކުރިއަށް ގެންދަނީ، ކަމާބެހޭ ފަރާތްތަކާއި ގުޅިގެން އެކުލަވާލެވުނު 7 އަސާސަކަށް ބިނާކޮށްގެންނެވެ.
މިޕްރޮގްރާމުގައި ފެށުމުގެ ގޮތުން މިދިޔަ އަހަރު އައްޑޫގެ އެކި އަވަށްތަކުގައި ސާރވޭ ކުރެވި، މިހާރުގެ ޙާލަތު ދެނެގަނެވުނެވެ. ދިވެހި ރެޑްކްރެސެންޓުން މަޢުލޫމާތު ދިން ގޮތުގައި ޕްރޮގްރާމް ފެށުމަށް 2014 ވަނަ އަހަރު ބޯހިމެނުމަށް ރިޢާޔަތް ކުރެވުނު ކަމަށާއި އެގޮތުން އޭރުގެ ތަފާސް ހިސާބުތަށް ދައްކާގޮތުން އައްޑޫސިޓީގައި 600 އެއްހާ މިފަދަ ކުދިން ތިބި ކަން ފާހަގަ ކުރެވުނު ކަމަށެވެ. އެހެން ކަމުން މިހާރުގެ ޙާލަތު ދެނެގަތުމަށް ސިޓީ ލެވެލްގައި އެސެސްމެންޓެއް ހަދައި ޕްރޮގްރާމުގައި ބައިވެރި ވާނެ ކުދިން ވަނީ ފާހަގަ ކޮށްފައެވެ.
މިޕްރޮގްރާމުގައި ބައިވެރިވި ކުދިންނާއި މިރަސްމީއްޔަތުގައި ވަނީ އެންރޯލްމެންޓް ސެޓްފިކެޓް ޙަވާލު ކޮށްފައެވެ. މިރަސްމީއްޔާތުގައި ވާހަކަ ދައްކަވަމުން، ޔުނިސެފުން ރާއްޖެ އަށް ކަނޑައަޅާފައި ހުންނަވާ ސަފީރު ޑރ. މުނީރު ސަފީލްޑިން ވަނީ ލިބިގެންމިދާ ދެވަނަ ފުރުޞަތު ދޫކޮށްނުލާ ބޭނުން ހިފުމަށް ކުދިންނަށް ހިތްވަރު ދެއްވާފައެވެ. ޑރ. މުނީރު ވިދާޅުވީ، މިއީ އައްޑޫގައި ތިބި ޒުވާނުންނަށް މިހާރުގެ ދިރިއުޅުމުގެ ހާލަތު ބަދަލު ކުރުމަށް ދެވޭ ފުރުޞަތެއް ކަމަށެވެ.
މިރަސްމީއްޔާތުގައި ވާހަކަ ދައްކަވަމުން އައްޑޫސިޓީ މޭޔަރ ޢަބްދުﷲ ޞާދިޤް ވިދާޅުވީ، އެއްވެސް ކުއްޖަކު ބާކީ ނުވާގޮތަށް ތަޢުލީމީ ސިޔާސަތެއް އޮތް ނަމަވެސް، މިފަދަ ކުދިން މުޖްތަމަޢު ތެރޭގައި ތިބިކަން ޤަބޫލު ކުރަން ޖެހޭ ކަމަށެވެ. އަދި އެކުދިން މުޖްތަމައަށް އަނބުރާ އައުމުގައި ހުރިހާ ފަރާތެއްގެ ވެސް އެއްބާރުލުން މުހިންމު ކަމުގައެވެ.
މިޕްރޮގްރާމުގައި ޖުމްލަ 35 ބައިވެރިން ބައިވެރިވެއެވެ. މީގެ ތެރެއިން ބައެއް ކުދިން މޯލްޑިވްސް ޕޮލިޓެކްނިކް އިން ހިންގާ އިލެކްޓްރިކަލް ވައިރިންގް ކޯސް ފުރިހަމަ ކުރަމުންދާ އިރު، 20 ކުދިންނަށް ވިލާ ކޮލެޖުގެ ފަރާތުން ސަން އައިލޭންޑުގައި ހިންގާ ސެޓްފިކެޓް ތްރީ އިން އެކުއޭޓިކް ރެކްރިއޭޝަން ކޯހުގައި ބައިވެރި ވާނެއެވެ. އެގޮތުން ވޯޓާ ސްޕޯޓްސް ޕްރޮގްރާމުގައި 14 ކުދިން ބައިވެރިވެފައިވާއިރު 4 ކުދިން ދަނީ ވައިރިން ކޯސް ހަދަމުންނެވެ. މީގެ އިތުރުން ދިރިއުޅުމުގެ ހުނަރު ތައް ދަސްކޮއްދޭ ކްލާހުގައި ގިނަ ކުދިން ދަނީ ބައިވެރިވަމުން ކަމަށް ދިވެހި ރެޑް ކްރެސެންޓު އައްޑޫ ގޮފިން މަޢުލޫމާތު ދެއެވެ.