ކެންސަރ ސޮސައިޓީ އޮފް މޯލްޑިވްސް އިންތިޒާމު ކޮށްގެން އައްޑޫގައި ބޭއްވި ކެންސަރުބައްޔަށް ސްކްރީން ކުރުމުގެ ޕްރޮގްރާމުގައި ގިނަ ޢަދަދެއްގެ މީހުން ސްކްރީން ކޮށްފިއެވެ.
އައްޑޫސިޓީ ކައުންސިލާއި، ހިތަދޫ ރީޖަނަލް ހޮސްޕިޓަލާއި، ފޭދޫއާއި ހުޅުމީދޫ ސިއްޙީ މަރުކަޒު ގުޅިގެން ކުރިއަށް ގެންދިޔަ މިޕްރޮގްރާމުގައި ތިން ބާވަތެއްގެ ކެންސަރަށް މީހުން ސްކްރީން ކުރިއެވެ. އެއީ އަނގައިގެ ކެންސަރާއި، އުރަމަތީގެ ކެންސަރާއި ރަހިމުގެ ދޮރަަށް ޖެހޭ ކެންސަރު ނުވަތަ ސާވިކަލް ކެންސަރެވެ. އައްޑޫސިޓީގެ ތިން އަވަށެއްގައި މިމަހުގެ 8އިން 10އަށް މިޕޮރޮގްރާމު ވަނީ ކުރިއަށް ގެންގޮސްފައެވެ.
މިސިޓީން އެންމެ ގިނަމީހުން ސްކްރީން ކޮށްފައި ވަނީ އުރަމަތީގެ ކެންސަރަށެވެ. އެގޮތުން އުރަމަތީގެ ކެންސަރަށް ޖުމްލަ 436 މީހުން ވަނީ ސްކްރީން ކުރެވިފައެވެ. އުރަމަތީގެ ކެންސަރަށް ފޭދޫންއިން 49 މީހަކު ސްކްރީން ކުރިއެވެ. އަދި ހުޅުމީދޫއިން 255 މީހެއް، ހިތަދޫއިން 132 މީހެއް އުރަމަތީގެ ކެންސަރަށް ސްކްރީން ކުރިއެވެ.
މިޕްރޮގްރާމުގައި 289 މީހުން އަނގައިގެ ކެންސަރަށް މުޅި އައްޑޫއިން ސްކްރީން ކުރިއެވެ. އެގޮތުން ފޭދޫއިން 47 މީހުން، ހުޅުމީދޫއިން 151 މީހުން، ހިތަދޫ 91 މީހުން ސްކްރީން ކުރިއެވެ. ރަހިމުގެ ދޮރަށްޖެހޭ ކެންސަރަށް ފޭދޫއިން 35 މީހެއް ސްކްރީން ކުރިއިރު ހުޅުމީދޫއިން 65 މީހެއް އަދި ހިތަދޫއިން 54 މީހެއްވަނީ ސްކްރީންކޮށް، މުޅި ޖުމްލަ 154 މީހުން އައްޑޫއިން ވަނީ ސްކްރީން ކޮށްފައެވެ.
އައްޑޫސިޓީގައި ކުރިއަށް ގެންދިޔަ ސްކްރީނިންގް ޕްރޮގްރާމުގައި 9 ޑޮކްޓަރުންގެ ޓީމަކުންވަނީ ބައިވެރިވެފައެވެ. މިއީ ދުރާލައި ކެންސަރު ބަލި ދެނެގަނެ މީހުން މިކަމަށް ހޭލުންތެރި ކުރުމަށް ރާއްޖޭގެ އެކި ސަރަހައްދު ތަކުގައި ކުރިއަށް ގެންދެވޭ ޕްރޮގްރާމެކެވެ. މީގެ ކުރީން ވެސް މިފަދަ ސްކްރީނިން ޕްރޮގްރާމްތަަށް އައްޑޫގައި ކުރިއަށް ގެންގޮސްފައި ވެއެވެ.