އައްޑޫ އިކުއިޓޯރިއަލް ހޮސްޕިޓަލް ހުޅުވައި ޚިދުމަތް ފަށާއިރު އިރުއޮއްސި 6:00ގެ ފަހުން ޚިދުމަތް ނުލިބޭނެކަމަށް ބުނާ ވާހަކަ އެ ހޮސްޕިޓަލުން ދޮގުކޮށްފިއެވެ.
މާލެ ސަރަހައްދުން ބޭރުގައި ސަރުކާރުން ތަރައްޤީ ކުރާ ފުރަތަމަ ޓާޝަރީ ހޮސްޕިޓަލް ކަމަށްވާ އައްޑޫ އިކުއިޓޯރިއަލް ހޮސްޕިޓަލް ހުޅުވުން ފަސްކޮށްފައިވާ ކަން މިއަދު ހެލްތު މިނިސްޓްރީން ވަނީ ހާމަ ކޮށްފައެވެ. ހޮސްޕިޓަލް ހުޅުވުން ފަސް ކުރިނަމަވެސް ހޮސްޕިޓަލް ލަސްތަކެއް ނުވެ ހުޅުވަން މަސައްކަތް ކުރަމުންދާ ކަމަށް އެހޮސްޕިޓަލުން ބުނެއެވެ. އެގޮތުން ޕްލޭން ކުރެވިފައިވާ ގޮތަށް ހޮސްޕިޓަލް ހުޅުވިގެން ދާނީ އޯޕީޑީ ޙިދުމަތާއި، ފިޒިއޯތެރަޕީ، ރޭޑިއޮލޮޖީ އަދި އިމާޖެންސީ ޚިދުމަތާއި އެކުގައި ކަމަށާއި އެއަށް ފަހު މަޑުމަޑުން ޙިދުމަތްތަށް އިތުރު ކުރަމުންދާނެ ކަމަށް އެ ހޮސްޕިޓަލުން ބުނެފައެވެ.
ހޮސްޕިޓަލް ހުޅުވާއިރު ރޭގަނޑު 6:00ގެ ފަހުން ހޮސްޕިޓަލުގެ ޙިދުމަތް ނުލިބޭނެ ކަމުގެ އަޑުތަށް ވަނީ ފެތުރިފައި ވާއިރު މިކަމާއި ގުޅޭގޮތުން ޕީއެސްއެމް އިން ކުރި ސުވާލަކަށް ޖަވާބު ދެމުން ހިތަދޫ ރީޖަނަލް ހޮސްޕިޓަލުގެ މެނޭޖަރ ޝަރަފުއްސާދާތު (ސާތު) ވިދާޅުވީ، އައު ހޮސްޕިޓަލުގެ އޯޕީޑީ ސްޕެޝަލިސްޓުންނާއި އެކު ހުޅުވިފައި ހުންނާނީ ހެނދުނު 9:00 އިން ހަވީރު 5:00 ކަމަށެވެ. ނަމަވެސް ހަވީރު 5:00 ގެ ފަހުން ވެސް އާންމު ބަލިތަކުގެ ޑޮކްޓަރުން އޯޕީޑީގައި ހަރަކާތްތެރިވާނެ ކަމަށާއި، ޓާޝަރީ ލެވެލްގެ ހޮސްޕިޓަލަކުން ކަނޑައެޅިފައިވާ ގޮތުގެ މަތީން ލިބެންވާ ހުރިހާ ޙިދުމަތެއްވެސް 24 ގަޑި އިރު ލިބިގެންދާނެ ކަމަށް އޭނާ ވިދާޅުވިއެވެ.
އައްޑޫ އިކުއިޓޯރިއަލް ހޮސްޕިޓަލް ހުޅުވުމަށް މިހާރު އެންމެ ފަހުގެ ތައްޔާރީތަށް ދަނީ ވަމުންނެވެ. ހޮސްޕިޓަލުން މައުލޫމާތު ދިން ގޮތުގައި މިހާރު ކުރިއަށް ދަނީ ހޮސްޕިޓަލްގެ ތެރޭގައި ހަދާ ފާމަސީގެ މަސައްކަތާއި ބައެއް ޑިޕާޓުމެންޓުތަކުގެ ފިނިޝިންގ މަސައްކަތެެވެ.