އައްޑޫ ފުޓުބޯޅަ މުބާރާތުގެ ސެމީ ފައިނަލްގައި ވާދަކުރާ ޓީމްތައް ކަށަވަރުވެއްޖެއެވެ.
އައްޑޫ ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ބައްދަލުކޮށްފައިވަނީ ފޭދޫ ސްްޕޯޓްސް އާއި ކްލަބު ރިވެރިންއެވެ. މިމެޗު ފޭދޫ ސްޕޯޓްސް އިން ކާމިޔާބުކުރީ 0-2 ގެ ނަތީޖާއަކުންނެވެ. މި ނަތީޖާ އާއި އެކު ގްރޫޕުގެ އެއްވަނަ ކުޅުނު 4 މެޗުން 12 ޕޮއިންޓް ހޯދައިގެން ލިބެނީ ފޭދޫ ސްޕޯޓްސް އަށެވެ. އަދި ދެމެޗުން 6 ޕޮއިންޓާއި އެކު ދެވަނަ ލިބުނީ ކްލަބު ރިވެރިންއަށެވެ.
ފޭދޫ ސްޕޯޓްސްއާއި ރިވެރިން ވާދަކުރި މެޗުގެ ބޮޑު ބައި ކުޅުނީ ވިއްސާރައިގައެވެ. ފުރަތަމަ ހާފުގައި ދެޓީމުން ލަނޑު ޖަހާނެ ރަނގަޅު ފުރުސަތުތައް ހޯދިއެވެ. ފުރަތަމަ ހާފުގައި ފޭދޫ ސްޕޯޓްސް އަށް ލީޑް ނަގައިދިނީ އަލީ ލިރުއާމެވެ. އެޓީމުގެ ދެވަނަ ލަނޑު ދެވަނަ ހާފުގައި ޖަހައިދިނީ ހަސަން ހާޒިގެވެ.
މެޗަށްފަހު ފޭދު ސްޕޯޓްސްގެ ކޯޗު އަލީ ޝިނާޒް ބުނީ، ގްރޫޕު އެއްވަނައިގެ ގޮތުގައި ގްރޫޕް ސްޓޭޖު ނިންމާލަން ވަރަށް ބޮޑަށް ބޭނުންވި ކަމަށެވެ. އެޓީމު ސެމީ ފައިނަލުގައި ވާދަ ކުރާ ގޯދިއްޔާ އާއި ދެކޮޅަށް މޮޅުވެ ފައިނަލުގައި ކުޅުމުގެ ވަރަށް ބޮޑު އުންމީދެއް އެބައޮތް ކަން އޭނާ ފާހަގަ ކުރިއެވެ.
ރިވެރިން ޓީމުގެ ކޯޗު ހަސަން ރަޝީދު ބުނީ މެޗުން ބަލިވީ ވާރޭ ވެހުމުގެ ސަބަބުން ބޭނުންވި ގޭމް ޕްލޭނަށް ނުކުޅެވިގެންކަމަށެވެ. އެޓީމަކީ ތިރިން ޕާސްކޮށްގެން ކުޅޭ ބަޔަކަށްވުމުން ވާރޭގެ ސަބަބުން ޓީމަށް ވަރަށް ބޮޑަށް އުނދަގޫވިކަމަށް އޭނާ ބުންޏެވެ. ހަސަން ރަޝީދު ބުނީ ސެމީ ފައިނަލުގައި ކުޅެން ޖެހޭ ބޭރުމަތި ޓީމު ވަރަށް ބޮޑަށް ދެނެގަންނަމުން އަންނަކަމަށާއި، މެޗުން މޮޅުވެ ފައިނަލުގައި ފޭދޫ އާއި ކުޅެން އުންމީދު ކުރާ ކަމަށެވެ.
މިމުބާރާތުގެ ފުރަތަމަ މެޗުގައި މިމަހުގެ ނުވަވަނަ ދުވަހު ރިވެރިން ނިކުންނާނީ އެފްސީ ބޭރުމައްޗާއި ދެކޮޅަށެވެ. ސެމީ ފައިނަލުގެ ދެވަނަ މެޗު 10 ވަނަ ދުވަހު ފޭދޫ ސްޕޯޓްސް އާއި ގޯދިއްޔާ ވާދަކުރާ އިރު، މުބާރާތު ފައިނަލް އޮންނާނީ މިމަގުގެ ތޭރަވަނަ ދުވަހުގައެވެ.