އައްޑޫ ފްލެޓްތަކުގެ ހާލަތު ގޯސްވީ ފުލެޓްތައް ދޫނުކުރެވި ގިނަ ދުވަސް ވުމުން: ހައުސިންގ މިނިސްޓްރީ
އައްޑޫ ސިޓީގައި އިމާރާތް ކޮށްފައިވާ ފްލެޓްތައް، ބޭނުން ނުކުރެވި ގިނަ ދުވަސް ވުމުގެ ސަބަބުން އެތަންތަނުގެ ހާލަތު ހުރީ ގޯސްކޮށް ކަމަށް ހައުންސިންގް މިނިސްޓްރީން ވިދާޅުވެއްޖެއެވެ.
އައްޑޫގައި އިމާރާތް ކޮށްފައިވާ ފްލެޓްތަކުގެ މަސައްކަތް ނިމި، ފްލެޓްތަކަށް ފޯމު ހުށައެޅުމަށް 2016 ވަނަ އަހަރު ވަނީ ހުޅުވާލާފައެވެ. ނަމަވެސް އެފްލެޓްތަކަށް އެފަހަރު ކުރިމަތިލި މީހުންނަށް ފްލެޓް ހަވާލު ކުރެވޭ ވަރުވީ، މިދިޔަ އަހަރު ފަހުކޮޅުގައެވެ. އޭރު ފްލެޓްތަށް ދޫނުކުރެވި ދިގުލައިގެން ގޮސްފައިވަނީ އަސާސީ ޙިދުމަތް ގުޅައި ނުދެވޭތީ ކަމަށް އޭރުގެ ސަރުކާރުގެ ހައުސިންގ މިނިސްޓްރީން ދިޔައީ ވިދާޅުވަމުންނެވެ.
އައްޑޫގައި އިމާރާތް ކޮށްފައިވާ ފްލެޓްތަކުގައި މިހާރު މީހުން ދިރިއުޅެން ފަށާފައި ވާއިރު ދިރިއުޅޭ ފަރާތްތަކުގެ ކަންބޮޑުވުން ތަކެއް ވެސް އެބަހުއްޓެވެ. އެފަރާތްތަކަށް ދިމާވެފައިވާ މައްސަލަތައް ބަލައި ހައުސިންގް މިނިސްޓްރީން ދަނީ އެކަންކަން ހައްލުކުރުމުގެ މަސައްކަތް ކުރަމުން ކަމުގައި އެމިނިސްޓްރީން ވިދާޅުވެއެވެ. އެގޮތުން ބައެއް ފްލެޓުތަކުގައި ފެން ލީކު ވުމުގެ މައްސަލަ ހައްލުކޮށް ވަޅުތަކުގެ ދިޔަ ހިއްކައި، ގެންނަން ޖެހޭ އެހެން ބަދަލުތަކާއި މަރާމާތުގެ މަސައްކަތްތައް ދަނީ ކުރަމުންނެވެ. އަދި މިހާރު ފްލެޓް އިމާރާތްތަކުގައި ނަންބަރު ޖެހުމުގެ މަސައްކަތްވެސް ކުރަމުންގެންދާކަމުގައި އެމިނިސްޓްރީން ވިދާޅުވެ.
އެ މަސައްކަތަކާއި ގުޅޭ ގޮތުން ޕީއެސްއެމަށް މައުލޫމާތު ދެއްވަމުން ހައުސިން މިނިސްޓްރީގެ ސީނިއާ އެގްޒެކެޓިވް ޑައިރެކްޓަރ ހަސަން ވިދާޅުވީ، މިފްލެޓްތަށް މިސަރުކާރު އައި އިރުވެސް ހުރީ އަޅާ ނުލެވި ދޫކޮށްލެވިފައި ކަމަށެވެ. އެގޮތުން އައްޑޫގައި ފްލެޓްތަކާއި ހަވާލުވި އިރު، ފެނާއި ނަރުދަމާ ޙިދުމަތްވެސް ނުދެވި ހުރި ކަން އޭނާ ފާހަގަ ކުރެއްވިއެވެ.
އިމާރާތް ކުރެވި ބޭނުން ނުކުރެވި، މިހާ ގިނަ ދުވަސް ވުމުން ފްލެޓްތަކުގެ މައްސަލަތަކެއް ހުރެ ދާނެ ކަން އަޅުގަނޑުވެސް ޤަބޫލު ކުރަން. ފުރަތަމަ އަޅުގަނޑު އައި އިރު ފެނެއް ނެތް. ނަރުދަމާ އެއް ނެތް. އައްޑޫ ސިޓީ ގައި ހުރި ފްލެޓްތަކުގައި ވެސް އަދި ރައްޖޭގެ އުތުރާއި ދެކުނުގެވެސް ފްލެޓްތަކުގެ ހާލަތު ހުރީ ވަރަށް ގޯސްކޮށް. ނަމަވެސް މިނިސްޓްރީގެ ހުރިހާ މުވައްޒަފުން ކަހަލަ ގޮތަކަށް މަސައްކަތް ކޮށްގެން އަށެއްކަ މަސްދުވަސް ތެރޭގައި ފްލެޓްތަކަށް މީހުންނަށް ވަދެވޭވަރަށް މަސައްކަތް ކުރިއަށް ގެންދެވުނު. " ހަސަން ވިދާޅުވިއެވެ.
ފްލެޓްތަކުގައި މީހުން ދިރިއުޅެން ފެށިއިރު، ގިނަ ކަންބޮޑުވުންތަކެއް ހުރީ ފްލެޓްތަކުގެ އެތޭރޭގެ މެއިންޓެނެންސް މައްސަލަތައް ހުރުމުންނެވެ. އެގޮތުން ދިރިއުޅެން ނުފަށަނީސް ފްލެޓްތައް ވެރިފަރާތަކާއި އެކު ގޮސް މެއިންޓެނެންސް ނޯޓު ކުރި ނަމަވެސް، ދިރިއުޅެން ފެށުމާއި އެކު ބައެއް މައްސަލަތައް ދިމާވި ކަން ދިރިއުޅޭ ފަރާތްތަކުން ވަނީ ފާހަގަ ކޮށްފައެވެ. މިކަމާއި ގުޅިގެން ހައުސިންގް މިނިސްޓްރީ ވިދާޅުވީ، ފްލެޓްތަކުގެ މަރާމާތަށް ލިސްޓު ކުރެވުނު ކަންކަމަށް ފައިސާ ހަވާލު ކުރަމުންދާ ކަމަށާއި، އަދި އިތުރަށް ދިމާވެގެން ރިޕޯޓު ކުރާ ކަންކަމަށްވެސް ވީހާއަވަހަކަށް ހައްލު ހޯދައި ދޭނެ ަމަށެވެ.
މިދިޔަ ހަފްތާ ތެރޭގައި ހައުސިންގ މިނިސްޓްރީގެ އެކި ފަންތީގެ ބޭފުޅުންނާއި އަދި ހައުސިންގ މިނިސްޓަރ ވެސް ވަނީ އައްޑޫގެ ފްލެޓްތަކުގެ ދިރިއުޅޭ ފަރާތްތަކާއި ބައްދަލު ކުރައްވާފައެވެ. އަދި އެފަރާތްތަކުގެ ހުރި ކަނބޮޑުވުންތަކަށް ވީހާވެސް އަވަސް ހައްލެއް ހޯއްދަވައި ދެއްވާނެ ކަމުގެ ޔަޤީން ކަން ވަނީ ދެއްވާފައެވެ. ކުރިއަށް އޮތް ތަނުގައި ފްލެޓް ތަކުގެ މެއިންޓެނެންސް މަސައްކަތް ކުރިއަށް ގެންދާނީ ކައުންސިލުތަކުން ކަމަށާއި، އަދި މިހާރު އިއުލާން ކުރާ ފްލެޓްތަކުގައި ހުރި މަރާމާތަށް ބޭނުންވާ ކަންކަން ބަލާފައި ނޫނީ އެފްލެޓްތައް ދޫނުކުރާނެ ކަމަށެވެ.