"އެޖެންޑާ19 ރަށަށް" ވޯކްޝޮޕުގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު އައްޑޫސިޓީއަށް ވަޑައިގެންފިއެވެ.
ރައީސް ނަޝީދު އައްޑޫސިޓީ އަށް ވަޑައިގެންފައިވަނީ އިރުއޮއްސި 6:45 ހާއިރުއެވެ. އެމަނިކުފާނަށް ގަން އެއާޕޯޓުން މަރުހަބާ ދެންނެވީ އައްޑޫސިޓީގެ މޭޔަރާއި، އެސިޓީއަށް ނިސްބަތްވާ ބައެއް މަޖިލިސް މެންބަރުންގެ އިތުރުން، ކައުންސިލު އިންތިހާބުގައި އެޕާޓީގެ ޕްރައިމަރީގައި ވާދަ ކުރައްވާ ކެނޑިޑޭޓުންނާއި އެމްޑީޕީއަށް ތައީދު ކުރާ ފަރާތްތަކުންނެވެ.
ރައީސް ނަޝީދު އައްޑޫސިޓީ އަށް ވަޑައިގެންފައިވަނީ، "އެޖެންޑާ 19 ރަށަށް" މިނަމުގައި އައްޑޫސިޓީގައި އެމްޑީޕީން ބާއްވާ ވޯކްޝޮޕުގައި ބައިވެރިވެ ވަޑައިގެންނެވުމަށެވެ. މިވޯކްޝޮޕު ފެށުމަށް ހަމަޖެހިފައިވަނީ، މާދަމާ ހެނދުނު ޝަރަފުއްދީން ސްކޫލުގައެވެ.
އެޖެންޑާ 19 ރަށަށް ވޯކްޝޮޕަކީ ކައުންސިލު އިންތިހާބުގައި އެމްޑީޕީއިން ވާދަކުރާއިރު، ރައްޔިތުންނަށް ވާނޭ ވައުދުތައް ދެނެގަތުމަށާއި، ކައުންސިލްތަކަށް ހިންގޭނެ މަޝްރޫޢުތައް ދެނެގަތުމަށް ބާއްވާ ވޯކްޝޮޕެކެވެ.
ހއ. އަދި ހދ. އަތޮޅު ފިޔަވައި 18 ސަރަހައްދެއްގައި މިވޯކްޝޮޕް ކުރިއަށް ގެންދިއުމަށް ވަނީ ހަމަޖެހިފައެވެ. މިވޯކުޝޮޕު ބޭއްވުމުގެ ކުރިން އެސަރަހައްދުތަކުގައި ޑޯޓުޑޯ ޖައްސައި ރައްޔިތުންގެ ޝަކުވާތަށް އޮޅުންފިލުވާނެ ކަމަށްވެސް އެމްޑީޕީން ބުނެއެވެ.