އައްޑޫ ސިޓީ ތަރައްޤީކުރެވޭނީ ލިބޭ ޢާމްދަނީ އެސިޓީގައި ހިފަހައްޓަައި ބޭރުގެ އިންވެސްޓްމަންޓަށް ފުރުސަތު ހުޅުވާލައިގެންކަމަށް އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ "އެޖެންޑާ 19 ރަށަށް" ވޯރކްޝޮޕުގައި ބައިވެރިވެވަޑައިގަތުމަށް މިހާރު އައްޑޫސިޓީ އަށް ކުރައްވަމުން ގެންދަވާ ދަތުރުފުޅުގައި ފޭދޫ އެމްޑީޕީ ހަރުގޭގައި ވާހަކަފުޅުދައްކަވަމުންނެވެ. ރައްޔިތުންގެ ކަންބޮޑުވުންތަށް އަޑު އައްސަވައި އެމަނިކުފާނުވަނީ އެމީހުންގެ ސުވާލުތަކަށް ޖަވާބު ދެއްވާފައެވެ. އެމަނިކުފާނު ވިދާޅުވީ ތަނެއްގެ ތަރައްޤީ ނެރެވޭނީ އެތަނެއްގައި ދިރިއުޅޭ މީހުންގެ އިތުރުން އެހެން ބައެއްގެ ފައިސާ އެތަނަކަށް އިންވެސްޓު ކުރެވިގެން ކަމަށެވެ.
ރައީސް ނަޝީދު ވިދާޅުވިގޮތުގައި އަވަހަށް ތަނެއް ތަރައްޤީކުރުމަށް، ބޭނުންވާ ފައިސާ އެތަނެއްގައި ނެތްނަމަ ބޭރުން އިންވެސްޓުމަންޓުތައް ގެންނަން ޖެހެއެވެ. އަދި އެއިންވެސްޓުމެންޓު މެދުވެރިކޮށް ވަޒީފާގެ ފުރުސަތު އުފައްދައިގެން މެނުވީ ތަރައްޤީ އަވަސް ނުކުރެވޭނެކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ މިފަހަރުގެ ކައުންސިލު އިންތިޚާބުގައި އެމްޑީޕީގެ އެންމެބޮޑު އަމާޒަކީ އެޕާޓީގެ ވަޢުދުތައް ކަމަށްވާއިރު އެވަޢުދުތައް ވާންޖެހޭނީ ކައުންސިލަށް ލިބޭ ބަޖެޓު ރަށުގައި ހިފެހެއްޓޭގޮތަކަށް ކަންކަން ބައްޓަންކުރުމެވެ. އަދި އެކަން ކުރެވޭނީ، ކައުންސިލުތަކުން ހިންގާ މަޝްރޫޢުތަކަށް އެރަށަކަށް ނިސްބަތްވާ ކުންފުނިތަކުން ކުރިމަތިލައިގެން ކަމަށްވެސް ރައީސް ނަޝީދު ވިދާޅުވިއެވެ.