އައްޑޫގައި ކުރިއަށްދާ އެމްޑީޕީގެ ކެމްޕެއިން ހަރަކާތް "އެޖެންޑާ 19 ރަށަށް" ވޯރކްޝޮޕު 190 އެއްހައި ބައިވެރިންނާއި އެކު ފަށައިފިއެވެ.
ހިތަދޫ ޝަރަފުއްދީން ސްކޫލުގައި ކުރިއަށްދާ މިވޯރކްޝޮޕަކީ، ކުރިއަށް އޮތް ލޯކަލް ކައުންސިލު އިންތިޚާބުގައި އެމްޑީޕީގެ ޕްރައިމަރީގައި ވާދަކުރައްވާ ކެންޑިޑޭޓުންނަށް، ކެމްޕެއިން ކުރުމުގައި އިސްކަންދޭންވީ ކަންކަމާއި، ލާމަރުކަޒީ ޤާނޫނަށް އަައިސްފައިވާ ބަދަލުތަކާބެހޭ މަޢުލޫމާތު ދިނުމަށް ބާއްވާ ވޯރކްޝޮޕެކެވެ. އަދި މީގެއިތުރުން ކައުންސިލްތަކުގެ އިޚްތިޞާސް ހިމެނޭ ސަރަޙައްދުތަކަށް ބަޖެޓުގައި ކަނޑައަޅާފައިވާ މަޝްރޫއުތަކާއި ގުޅިގެން މި ވޯރކްޝޮޕް ތެރޭގައި މަޢޫލޫމާތު ދޭނެއެވެ.
މިވޯރކްޝޮޕު ފެށްޓެވުމުގެގޮތުން ވާހަކަފުޅު ދައްކަވަމުން އެމްޑީޕީގެ ރައީސް، ރައީސް ނަޝީދު ވިދާޅުވީ މިވޯރކްޝޮޕުގެ އެންމެ ބޮޑު ބޭނުމަކީ އެމްޑީޕީގެ ފަރާތުން ރައްޔިތުންނަށް ވާނެ ވަޢުދުތަކެއް ކަނޑައެޅުން ކަމަށެވެ.
"ޕާޓީގެ ފަރާތުން ރައްޔިތުންނަށް ހުށަހަޅާނެ ހުށަހެޅުންތަށް އެކުލަވާލަން އަޅުގަނޑުމެން އެދެން. ޕާޓީގެ އަމާޒަކީ، ކުރިއަށް އޮތް ކައުންސިލުގެ އިންތިހާބުގައި މިސީޓީ އަށް ހުށަހަޅާނެ ސިޔާސަތުތަކާއި އަދި ވާނެ ވަޢުދުތަށް ކަނޑައެޅުން." ރައީސް ނަޝީދު ވިދާޅުވިއެވެ.
އެމަނިކުފާނު ވަނީ އައްޑޫސިޓީ ކައުންސިލުގެ ބަޖެޓާއި ގުޅޭ ކުރު ޙުލާސާއެއްވެސް ދެއްވާފައެވެ. އެގޮތުން މިއަހަރު ލާމަރުކަޒީ ޤާނޫނަށް އައި ބަދަލާއެކު ދައުލަތުގެ ހިލޭ އެހީގެ ގޮތުގައި 73 މިލިއަން ރުފިޔާ ލިބިގެންދާނެ ކަން އެމަނިކުފާނު ފާހަގަ ކުރެއްވިއެވެ. އަދި މީގެ އިތުރުން ސިޓީގެ އާމްދަނީގެ ގޮތުގައި އިތުރު 7 މިލިއަން ރުފިޔާ ލާފާކޮށްފައިވުމާއި ވަޢުދުތަށް ކަނޑައެޅުމުގައި އެބަޖެޓުގެ ތެރެއިން ވިސްނުމަށް ވަނީ އެދިވަޑައިގެންފައެވެ.
އައްޑޫގެ އެކި ސަރަހައްދުތަކުން އެމްޑީޕީ މެންބަރުން މިވޯރކްޝޮޕުގައި ބައިވެރިވިއެވެ. ސިޓީ ކައުންސިލުގެ 12 ދައިރާއަކަށް އެމްޑީޕީ ޕްރައިމަރީގައި 39 ކެންޑިޑޭޓުން ވާދަ ކުރާނެއެވެ. އަދި މޭޔަރު ކަމަށް އެޕާޓީގެ 3 ކެނޑިޑޭޓުން ޕްރައިމަރީގެ ވާދަ ކުރާނެއެވެ.