އިކުއެޓޯރިއަލް ހޮސްޕިޓަލުގައި ސްޕީޗް ތެރަޕީގެ ޚިދުމަތް ދޭން ފަށައިފި

އައްޑޫ ސިޓީ އިކުއެޓޯރިއަލް ހޮސްޕިޓަލުގައި ސްޕީޗް ތެރަޕީގެ ޚިދުމަތް ދޭން ފަށައިފިއެވެ.

މިހޮސްޕިޓަލުގައި ސްޕީޗް ތެރަޕީގެ ޚިދުމަތް ދިނުމަށް ފަށާފައިވާއިރު، މިކަމަށް ޚާއްސަ މުވަޒަފުންވެސް ވަނީ އެހޮސްޕިޓަލުގެ ޓީމާ ގުޅިފައެވެ. މިއީ މާލެ ސަރަހައްދުން ބޭރުގައި ސްޕީޗް ތެރަޕީގެ ޚިދުމަތް ސަރުކާރު ހޮސްޕިޓަލެއްގައި ދޭން ފެށި ފުރަތަމަ ފަހަރެވެ.

މިކަމާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން އެހޮސްޕިޓަލުގެ އޮފިޝަލަކު ވިދާޅުވީ، އެއްވެސް އިރެއްގައި މިފަދަ ޚިދުމަތްތަކަށް ހޮސްޕިޓަލުން އަގެއް ނެގުމުގެ ވިސްނުމެއް ނެތްކަމަށެވެ. އެހޮސްޕިޓަލުގައި މިޚިދުމަތް ފެށިއިރު، ޚިދުމަތް ބޮޑަށް އަމާޒުކޮށްފައިވަނީ ކުޑަ ކުޑަކުދިންނަށެވެ.

ސްޕީޗް ތެރަޕީގެ ޚިދުމަތަކީ ވާހަކަ ދެއްކުމުގައި ދަތިތަކެއް ހުންނަ ފަރާތްތަކަށް ދެވޭ ޚާއްސަ ޚިދުމަތެކެވެ. އިކުއެޓޯރިއަލް ހޮސްޕިޓަލުއިން ވިދާޅުވިގޮތުގައި ސްޕީޗް ތެރެޕީގެ ޚިދުމަތާއެކު ވަރަށް އަވަހަށް އޯޑިއޯމެޓްރީގެ ޚިދުމަތްވެސް ފަށާނެއެވެ. އައްޑޫގައި ސިއްޙީ ޙިދުމަތްދޭ އަމިއްލަ ފަރާތްތަކުންވެސް މިޚިދުމަތް ދެއެވެ. ނަމަވެސް ދެމެހެއްޓެނިވި ގޮތެއްގައި މިފަދަ ޚިދުމަތެއް ނެތުމަކީ ބެލެނިވެރީންގެ ވަރަށްބޮޑު ޝަކުވާއެކެވެ.

ހިތަދޫ ރީޖަނަލް ހޮސްޕިޓަލުން ދެމުންއައި ޚިދުމަތްތައް އިކުއެޓޯރިއަލް ހޮސްޕިޓަލަށް ބަދަލު ކުރުމުގެ މަސައްކަތް ކުރިއަށް ދާއިރު، މިހާރު ބަދަލު ނުކުރެވިހުރީ ހަމައެކަނި އިންޕޭޝަންޓް އަދި އިމަޖެންސީގެ ޚިދުމަތް އެކަނިކަމަށް އެހޮސްޕިޓަލުން ވިދާޅުވެއެވެ. މީގެ އިތުރުން އީއީޖީގެ ޙިދުމަތްވެސް ފެށުމަށް ތައްޔާރު ވަމުންދާކަމަށް އެހޮސްޕިޓަލުން ވިދާޅުވެއެވެ.

އޭއީއެޗްއިން ސްޕެޝަލިސްޓް ޑޮކްޓަރުންގެ ޚިދުމަތް ފަށާފައިވާއިރު، އެތަނުގެ ޙިދުމަތް ދެމުންދަނީ ހެނދުނު 8 އިން 4 ޖެހުމާއި ހަމައަށެވެ. އަދި އޭގެ ފަހުން އާންމު ބަލިތަކުގެ ޑޮކްޓަރުންގެ ޙިދުމަތް ހަވީރު 4 އިން ރޭގަނޑު 10 އާއި ހަމައަށް ރީޖަނަލް ހޮސްޕިޓަލުން ލިބޭނެއެވެ.