އައްޑޫސިޓީގެ ތަރިކަ ރައްކާތެރި ކުރުމާއި ގުޅޭ ގޮތުން، މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖާއި އެކު އައްޑޫސިޓީ ކައުންސިލުން މަޝްވަރާ ކޮށްފިއެވެ.
މިނިސްޓްރީ އޮފް އާޓްސް ކަލްޗަރ އެންޑް ހެރިޓޭޖްގެ ޚާއްސަ ޓީމެއް މިނިސްޓަރ ޔުމްނާ މައުމޫނާއި އެކު އައްޑޫގައި މިހާރު ދަނީ ހަރަކާތްތެރިވަމުންނެވެ. އެގޮތުން މިނިސްޓްރީގެ އެކި ސެކްޝަން ތަކުގެ އިސްވެރިންނާއި ސްޓޭޓް މިނިސްޓަރުން އަދި ޑެޕިއުޓީ މިނިސްޓަރުންގެ މިދަތުރުގައި ބައިވެރިވެއެވެ.
މިއީ މިނިސްޓަރުކަމާއި ހަވާލުވެވަޑައިގެންނެވުމަށް ފަހު އެކަމަނާ އައްޑޫ ސިޓީއަށް ކުރައްވާ ރަސްމީ ފުރަތަމަ ދަތުރުފުޅެވެ. މިދަތުރުފުޅުގެ މަޤްސަދަކީ އައްޑޫގެ ފަންނުވެރިކަން ދިރުވުމަށް ކުރަން ޖެހޭ މަސައްކަތްތަށް ބަލައި ތަރިކަ ރައްކާތެރިކުރުމަށް ކުރެވިދާނެ ކަންކަން ދެނެގަތުން ކަމަށް މިނިސްޓްރީން ވިދާޅުވެއެވެ.
އައްޑޫސިޓީ ކައުންސިލާއި އެކު ބޭއްވި ބައްދަލުވުމުގައި ވާހަކަ ދައްކަވަމުން މިނިސްޓަރ ޔުމްނާ ވިދާޅުވީ، އައްޑޫގެ މާއްދީ ތަރަކައިގެ ގޮތުގައި ގިނަ ތަންތަން އެބަހުރި ކަމަށާއި، މީގެ އިތުރުން އައްޑޫގެ މައުނަވީ ތަރިކައިގެ ގޮތުގައި ހުރި، އައްޑޫ ބަހުރުވަ، ހާއްސަ ކުޅިވަރު، ހާއްސަ އާދަކާދަ، މަސައްކަތްތެރިކަން ހިމެނޭކަމަށާއި މިއީ ވެސް ރައްކާތެރި ކުރަންޖެހޭ ކަންކަން ކަމަށެވެ. މީގެ އިތުރުން މިނިސްޓްރީގެ އެކި ސެކްޝަން ތަކުގެ ބޭފުޅުން ވަނީ އެސެކްޝަނަކާއި ގުޅޭ ގޮތުން އައްޑޫގައި ކުރެވިދާނެ ކަންކަމާއި މެދު މަޝްވަރާ ކޮށްފައެވެ.
މިބައްދަލުވުމުގައި އައްޑޫސިޓީގެ މޭޔަރު ވަނީ، އައްޑޫގެ ސަޤާފަތާއި ތަރިކައިގެ ތެރެއިން އައްޑޫ ބަހުރުވަ ގެއްލެމުންދާ ކަމުގެ ކަންބޮޑުވުން ފާޅުކުރައްވާފައެވެ. އަދި ބަހުގެ ސިޔާސަތެއްގެ ބޭނުންތެރިކަން ފާހަގަ ކުރެއްވިއެވެ. މީގެ އިތުރުން އައްޑޫގެ ތާރީޙު ރަސްމީ ސިފައެއްގައި ލިޔެވިފައި ނުވާކަން މޭޔަރ ވަނީ ފާހަގަ ކުރައްވާފައެވެ. މީގެ އިތުރުން ސިޓީ ކައުންސިލުން މިހާރު ބަލަހައްޓަމުންދާ ކޯގަންނު ބެލެހެއްޓުމުގައި ހުރި ދަތިތަށް ވަނީ ފާހަގަ ކުރައްވާފައެވެ.
އައްޑޫސިޓީ އަށް މިނިސްޓަރ ޔުމްނާ ކުރައްވަމުން ގެންދަވާ ދަތުރުފުޅުގައި އައްޑޫގެ ފަންނުވެރިންނާއި ބައްދަލުކުރުަމަށް ވަނީ ހަމަޖެހިފައެވެ، މީގެ އިތުރުން އައްޑޫގެ ރައްތަކުގެ ތަރިކައިގެ ގޮތުގައި ހިމެނޭ ތަންތަނަށް ޒިޔާރަތް ކުރުމަށް ވެސް ވަނީ ހަމަޖެހިފައެވެ.